Sulmuesi francez Kylian Mbappé ka reaguar pas eliminimit të skuadrës së tij nga Bayern Munich në çerekfinale të UEFA Champions League, duke shprehur zhgënjimin për rezultatin, por edhe vendosmërinë për rikthim.
Mbappé tha se skuadra e tij luftoi deri në fund, por nuk arriti të siguronte kualifikimin në fazën gjysmëfinale të garës më prestigjioze evropiane për klube.
“U përpoqëm deri në fund, por nuk ishte e mjaftueshme. Është zhgënjyese të eliminohesh nga një kompeticion kaq i rëndësishëm, por duhet të shohim përpara,” u shpreh ai.
Ai theksoi gjithashtu nevojën për analizë të thellë brenda skuadrës, duke nënvizuar rëndësinë e mentalitetit fitues në një klub si Real Madrid.
“Duhet ta analizojmë veten me shumë seriozitet që të mos përballemi më me zhgënjime të tilla. Nuk do të dorëzohemi kurrë. Në Madrid, dështimi nuk ka qenë kurrë dhe nuk do të jetë kurrë një opsion,” shtoi Mbappé.
