Gazetari i Infokusit, Shkëlzen Dakaj, ka vlerësuar se aktualisht Partia Demokratike e Kosovës dhe Lidhja Demokratike e Kosovës nuk kanë liderë të fortë në kuptimin e autoritetit dhe fuqisë politike brenda partisë.
Sipas tij, mungesa e një lidershipi të qartë po reflektohet në mënyrën se si funksionojnë këto subjekte, ku vendimmarrja nuk është më e centralizuar si dikur.
Duke bërë një krahasim me periudhën kur PDK udhëhiqej nga Hashim Thaçi, Dakaj ka theksuar se vendimet kryesore merreshin nga lideri pa u vënë në diskutim brenda strukturave partiake.
“Hashim Thaçi s’e ka pyet kërkon nëse duhet me pranu dikë në parti apo jo, kurrë nuk është bërë temë diskutimi, pavarësisht që ka pas pakënaqësi të mëdha”, ka deklaruar ai.
Sipas Dakajt, sot situata ka ndryshuar, duke shtuar se brenda partive ka shumë figura që tentojnë të ushtrojnë ndikim dhe shpesh imponohen përmes fuqisë elektorale.
“Janë bërë shumë ‘shefa’ në një parti dhe luajnë rolin e shantazhuesve. Kanë vota, kanë fuqi elektorale dhe pastaj imponohen, duke bërë zhurmë për t’u përfshirë në pozita apo për t’u renditur më mirë”, ka thënë ai.
