Ka kaluar një javë dhe Dritan Gjika, i dyshuar si mbreti i kokainës, i njohur si “Tony”, ende po pret të paguhet për “biznesin” e tij.
Siç raporton Top Channel, në investigimin e kryer nga OCCRP (Projekti për Raportimin e Krimit të Organizuar dhe Korrupsionit), janë zbuluar mesazhet ku Gjika i thotë partnerit të tij: “Shiko zotëri, partneri yt më tha se do të dërgonte paratë dje, pastaj më vonë më tha sot”, ku diskutohet për shitjen e “materialit” që ishte dërguar me kontejner nga Ekuadori në Spanjë.
Kur partneri i tij i thotë të “qetësohet” dhe të mos jetë kaq “mosbesues”, Gjika në mesazhe shpërthen: “Zotëri, nuk është mosbesim, është respekt! … Gjithçka ka arritur mirë, çmimi u vendos së bashku dhe ty të pëlqeu. Nuk kam nevojë të pres derisa ta shesë ngadalë atje për të marrë pagën time!”.
Më vonë ai sqaroi: “Është thjesht biznes dhe na duhet shpejtësi”, citohen mesazhet e zbuluara.
Ky diskutim u zhvillua përmes mesazheve të koduara në platformën SkyECC, e preferuar nga kriminelët deri në vitin 2021, kur autoritetet evropiane arritën ta dekriptonin.
Sipas raportimeve, pas dekriptimit, mesazhet e Sky u ndanë me autoritetet në mbarë botën, përfshirë Ekuadorin, ku Gjika, i lindur në Shqipëri, është i kërkuar për akuzat e krimit të organizuar dhe pastrimit të parave.
OCCRP ka siguruar qindra faqe të bisedave të Gjikës në Sky, të cilat janë përdorur nga prokurorët ekuadorianë si provë në gjyqin kundër tij dhe anëtarëve të dyshuar të rrjetit të tij.
Bisedat, që shtrihen nga maji 2020 deri në mars 2021, tregojnë për herë të parë aktivitetin e përditshëm të një organizate të fuqishme trafiku droge, e cila funksiononte si një korporatë ndërkombëtare, me synim fitimin maksimal.
Mesazhet po ashtu zbulojnë nivelin e lartë të infiltrimit në policinë dhe portet e Ekuadorit, një vend që vitet e fundit është shndërruar në një super-autostradë për kokainën.
Sipas prokurorëve, të paktën 17 persona të akuzuar për pjesëmarrje në këtë organizatë janë dënuar në Ekuador, 15 prej të cilëve presin apelimin. Katër të tjerë janë dënuar për pastrim parash nga kjo tregti, duke bërë transferime që kapin më shumë se 43 milionë dollarë midis viteve 2015 dhe 2023.
Gjika, i cili dyshohet se ishte udhëheqësi i rrjetit dhe një nga të kërkuarit më të mëdhenj në Ekuador, arriti të largohet nga vendi pa u vënë re. Ai u arrestua më vonë në Abu Dabi në maj 2025 dhe tani pret ekstradimin në Ekuador, ku ka urdhër gjyqësor për t’u paraqitur në gjykatë.
Avokatët e tij nuk iu përgjigjën kërkesave për koment, por gjatë një seance para gjykatës në Ekuador argumentuan se nuk kishte prova të mjaftueshme dhe vunë në dyshim ligjshmërinë e marrjes së mesazheve në Sky.
Sipas bisedave të kapura, Gjika ishte i përfshirë në pothuajse çdo aspekt të operacionit të tij të dyshuar, nga marrja e shoferëve, menaxhimi i transportit dhe llogaritja e borxheve. Ai vlerësonte besueshmërinë dhe diplomacinë dhe dukej se kishte fituar besnikëri të fortë nga bashkëpunëtorët e tij.
Një bashkëbisedues i tij shkroi: “Do të shkoj me ty kudo që të më thuash, vëlla… dhe me sytë mbyllur”, pas deklaratës së Gjikës se kishte “shumë punë” për t’i ofruar në dhjetor 2020.
Megjithëse nga Shqipëria, Gjika kishte zotësi të dukshme në spanjishten e folur, me përdorim të termave lokalë dhe koduar për aktivitetet e tij. Për shembull, një kuti mund të përfaqësonte një kontejner të mbushur me kokainë, ndërsa “the uglies” i referohej policisë.
Në një bisedë të hapur, një partner i tij e përshkruan aktivitetin si “traqueteando,” një term lokal për trafikimin e drogës: “… e vërteta është që ne po traqueteamos, jo që shesim vezë me shumicë duke kërkuar zbritje… kjo është mënyra ime e të vepruarit, vëlla”.
Gjika mbërriti për herë të parë në Ekuador në 2009, si pjesë e një valë të të huajve nga Ballkani që afruan pranë burimeve të kokainës. Edhe pse Ekuadori nuk prodhon drogë, vendi është bërë qendra kryesore e eksportit, ku grupe kriminale shqiptare, meksikane dhe kolumbiane kanë shfrytëzuar tregtinë detare, përfshirë transportin e bananeve.
Eksperti Renato Rivera nga Iniciativa Globale kundër Krimit të Organizuar Ndërkombëtar (GI-TOC) tha se trafikantët shqiptarë sollën një kulturë korporative në biznesin e kokainës, me fokus në fitimin financiar dhe jo luftërat territoriale. Rrjeti i Gjikës ishte fleksibël dhe nuk kishte aleanca të forta me bandat më të mëdha të Ekuadorit.
