Ish-deputetja e Vetëvendosjes, Arbëreshë Kryeziu-Hyseni, i është drejtuar Vjosa Osmanit pasi kjo ngriti pyetjen për një takim të kryeministrit në detyrë, Albin Kurti, me presidentin e Serbisë, Aleksandar Vuçiq, si dhe me ish-emisarin e BE’së, Miroslav Lajçak, në Bruksel, derisa po fliste në një tubim me simpatizantë.
Osmani u pyet për një takim me liderë rajonalë në SHBA ku prezent ishte edhe emisari i presidentit Trump, Richard Grenell, si dhe ministri i jashtëm serb, Marko Gjuriq.
Ajo tha se për këtë takim s’ka asgjë për të fshehur dhe se Presidenca atëherë e kishte bërë publik dhe shtoi se temat e diskutuara aty ishin për ekonomi.
“Pse po sulmohet një takim zyrtar, publik dhe ndërkombëtar, ndërkohë që askush nuk jep përgjigje për takimet e mbyllura “me orë të tëra” me Presidentin serb Aleksandar Vuciq dhe emisarin evropian Miroslav Lajcak?”, tha Osmani në këtë tubim.
Kësaj deklarate i reagoi Kryeziu.
“Çka ka fol Kryeministri Kurti me Vuçiqin flasin veprimet në Veri! Kishte me qenë mirë me na tregu çka fole ti me Grenellin e Gjuriqin në tetor 2025? Prej kujt u fshehe që nuk e bëre publike asnjë foto të atij takimi?”, shkroi ajo.
