Kandidati i Lëvizjes Vetëvendosje për deputet në zgjedhjet e 7 qershorit, Viktor Buzhala, ka reaguar ndaj akuzave për mungesë patriotizmi, duke prezantuar historinë e familjes së tij dhe kontributin e saj ndër breza.
Në një video në Facebook, Buzhala tha se po flet nga rruga kryesore e Buzhalëve, e cila mban emrin e Augustin Buzhalës.
“Jam këtu te rruga kryesore e Buzhalëve, rruga Augustin Buzhala. Ju që akuzoni për deficit patriotik duhet ta dini se ky ka qenë axha i babait tim, i cili është vrarë duke luftuar fyt a fyt me çetnikët serbë”, deklaroi ai.
Buzhala theksoi se është djali i Prend Buzhalës, të cilin e cilësoi si një profesor të shquar dhe veprimtar patriot.
“Unë jam djali i Prend Buzhalës, profesorit të shquar të kësaj pjese, i cili tërë jetën e vet ia ka kushtuar aktivitetit patriotik. Ka qenë disa herë i burgosur politik dhe ka bërë veprimtari patriotike deri pas çlirimit të Kosovës”, u shpreh Buzhala.
Sipas tij, babai i tij ka vazhduar angazhimin edhe pas luftës përmes shkrimeve dhe veprimtarive kulturore, ndërsa edhe gjyshi i tij ka qenë i burgosur politik.
“Edhe gjyshi im ka qenë i burgosur politik”, tha ai.
Në fund, kandidati i Vetëvendosjes u bëri thirrje kritikëve që të shmangin akuzat e pabazuara dhe të mos e lidhin me persona të tjerë.
“Ju lutem, kur bëni akuza, bazohuni diku dhe mos më afroni me askënd tjetër. Kjo është linja ime familjare. Nuk dua të më përzieni me emrin e dikujt tjetër apo me diçka tjetër”, përfundoi Buzhala.
