Një rast i rëndë i tentim-vrasjes është raportuar pak pas mesnatës në Komoran të Gllogocit, ku një 19-vjeçar pretendon se është ndjekur me veturë dhe më pas është sulmuar me armë zjarri e shufër metalike.
Burime të Sinjalit bëjnë të ditur se ngjarja ka ndodhur në orët e para të 21 majit 2026, kur M. Arifi kishte dalë nga shtëpia e tij në Kishnarekë dhe kishte marrë rrugën në drejtim të Komoranit me veturën e tij Audi A5.
Sipas deklarimit të viktimës, vetëm pak metra pasi ishte nisur, kishte vërejtur një BMW të zezë të parkuar buzë rrugës, e cila menjëherë kishte nisur ta ndjekë nga prapa.
I dyshuari, sipas tij, e kishte përcjellë deri në Komoran, çka e kishte bërë të dyshonte se po vëzhgohej. Për ta testuar situatën, ai kishte devijuar qëllimisht rrugën, me shpresën që vetura t’i largohej, por ndodhi e kundërta.
Kur kishte arritur në rrugën “Imer Alushani”, viktima ka deklaruar se BMW-ja ishte ndalur në mes të rrugës dhe nga ajo kishin dalë Agnis Hyseni dhe Ardian Gjoka.
Sipas kallëzimit, Agnis Hyseni kishte nxjerrë armën dhe kishte shtënë dy herë në drejtim të Audit, ndërsa Ardian Gjoka kishte goditur veturën me shufër metalike mbi kapakun e motorit.
Për fat, 19-vjeçari nuk ka pësuar lëndime trupore, por automjeti ka marrë dëmtime.
Në vendin e ngjarjes kanë dalë të gjitha njësitet relevante të Policisë në Gllogoc, ndërsa më vonë janë përfshirë edhe Hetimet Rajonale, të cilat po merren intensivisht me rastin.
Rasti është iniciuar si “Vrasje në tentativë”.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
