Kandidati për kryetar të Aleancës për Ardhmërinë e Kosovës dhe i nominuari për kryeministër, Ardian Gjini, ka vlerësuar lart rrugëtimin politik të partisë dhe figurën e liderit të saj, Ramush Haradinaj, në Kuvendin e Përgjithshëm të AAK-së,.
Gjini tha se është krenar që është pjesë e kësaj partie dhe se përgjegjësia që po merr është e madhe.
“Është krenari me qenë një prej jush, është krenari me qenë pjesë e kësaj partie kaq të jashtëzakonshme, e njerëzve kaq të jashtëzakonshëm. Shumë shumë faleminderit secilit prej jush. Jam i emocionuar, sikur secili prej jush. Edhe pavarësisht faktit që kur dalim me fol në momente të këtilla na dridhen duart, prapëseprapë duhet me nis diqysh,” tha ai.
Ai foli edhe për konceptin e altruizmit në politikë, duke e lidhur atë me sakrificën dhe shërbimin ndaj vendit.
“A është politika altruizëm? Domethënë me pas njerëz që japin gjithçka për vendin, për kombin, për njerëzit që i rrethojnë, po nuk lypin kurrgjë në këmbim. Bota e mençur ka vendosur moti që nuk është krejt ashtu. Ata që thonë që janë altruistë shpesh janë e kundërta. Por luftëtarët e lirisë janë shembulli i vërtetë i altruizmit, ata që kanë dhënë gjithçka pa e ditur çfarë marrin në këmbim,” u shpreh Gjini.
Ai theksoi se sakrifica e së kaluarës po shpesh nuk po vlerësohet sa duhet.“Jemi në një moment kur mohohet altruizmi i vërtetë i njerëzve që kanë dhënë gjithçka për vendin e vet, ndërsa po mashtrohet opinioni me altruizëm fallso. Krejt fallso,” tha ai.
Gjini u ndal edhe te periudha e pasluftës dhe roli i AAK-së, duke thënë se besimi për vazhdimësinë e partisë po kërkohet pas udhëheqjes së Haradinajt.
“Po e lypim besimin tuaj mbas Ramush Haradinajt. Ai nuk ka qenë vetëm kryetar partie, është simbol i Kosovës, simbol i lirisë dhe i politikës së mençur që ka ndodhur në Kosovë për më shumë se 30 vjet,” theksoi Gjini.
Ai vlerësoi se figura e Haradinajt do të mbetet e shënuar në historinë e vendit.
“Jam absolutisht i bindur që historia e Kosovës dhe e Ramush Haradinajt do të shkruhet me shkronja të arta,” u shpreh ai.Në fund, ai tha se gjatë gjithë angazhimit të tij politik ka pasur një raport të veçantë besimi me Haradinajn.“Ekziston veç një njeri të cilin unë me 100% bindje e kam thirrur komandant, kryetar dhe kryeministër, dhe je ti. Për 26 vite shërbim, nuk do ta ndërroja asnjë minutë të vetëm të kësaj pune. Faleminderit kryetar,” shtoi Gjini.
