Ish-aktivisti i Lëvizjes Vetëvendosje, Albert Shabani, ka reaguar ashpër ndaj kryetarit të Mitrovicës, Faton Peci, duke e akuzuar për mosmirënjohje dhe ndryshim qëndrimi pas ardhjes në pushtet.
Përmes një postimi publik, Shabani ka thënë se Peci vepron “nën dirigjimin e Dejona Mihalit”, duke shtuar se deklaratat e tij janë të diktuara politikisht.
Ai ka vlerësuar kontributin e deputetes Albena Reshitaj, duke theksuar se vota e saj në vitin 2021 ishte vendimtare për mandatin katërvjeçar të koalicionit VV–GUXO në pushtet.
Shabani ka rikujtuar edhe angazhimin e tij gjatë zgjedhjeve lokale në Mitrovicë, duke thënë se kishte qenë pranë Pecit gjatë balotazhit me kandidatin e PDK-së, Arian Tahiri, në natën e 12 tetorit 2025. Sipas tij, gjatë fushatës kishte mobilizuar edhe mërgimtarë për ta mbështetur Pecin, ndërsa pas fitores raportet dhe komunikimi me të kishin ndryshuar plotësisht.
“Nuk kishte më përgjigje në mesazhe dhe as emoji zemre, si gjatë kohës së fushatës”, ka shkruar ai. Në fund të reagimit, Shabani ka përmendur edhe raportet politike mes Faton Pecit, Donika Gërvallës dhe presidentes Vjosa Osmani, duke i cilësuar si “tradhti politike” ndaj Osmanit.
Ai e ka mbyllur reagimin me tone ironike, duke e sfiduar Pecin që të reagojë publikisht ndaj deklaratave të tij.
