Një ngjarje e rëndë ka ndodhur gjatë orëve të natës në fshatin Dolak të Vushtrrisë, ku është përfshirë nga zjarri shtëpia e Driton Pllanës, djalit të vetëm të martirit të lirisë, Sabri Hashim Pllana.
Lajmi është bërë i ditur përmes një reagimi publik, ku shprehet dhimbje e madhe për humbjet e shkaktuara familjes Pllana.
Sipas reagimit, banorët e lagjes prej kohësh kanë ngritur shqetësime lidhur me gjendjen e rrjetit elektrik në zonë, duke pretenduar se kanë bërë ankesa dhe kërkesa të vazhdueshme për ndërhyrje. Ata thonë se ekipet përgjegjëse kanë kryer edhe matje në terren dhe kanë konstatuar probleme që kërkojnë zgjidhje.
Banorët kërkojnë që rasti të hetohet në tërësi dhe të zbardhen shkaqet që çuan në shpërthimin e zjarrit.
“Kur qytetarët paralajmërojnë me kohë për problemet dhe nuk merren masat e nevojshme, pasojat nuk mbesin vetëm materiale, por prekin drejtpërdrejt familjet”, thuhet në reagimin e publikuar.
Deri më tani nuk ka një konfirmim zyrtar për shkakun e zjarrit, ndërsa autoritetet pritet të sqarojnë rrethanat e plota të rastit.
