NATO përmes një komunikate për media ka njoftuar për përfundimin e parë të stërvitjes së përbashkët me forcat serbe. Në njoftim thuhet se kjo stërvitje shënon një moment të rëndësishëm bashkëpunimi praktik në mes të NATO-s dhe Serbisë në kuadër të Partneritetit për Paqe.
“Gjatë dy javëve, afërsisht 600 trupa nga vendet aleate të NATO-s u stërvitën së bashku me personelin e Forcave të Armatosura Serbe, në një seri skenarësh fiktivë të hartuar për të forcuar bashkëpunimin profesional ushtarak dhe për të përmirësuar koordinimin. Ushtrimi mblodhi së bashku personel ushtarak nga Serbia, Italia, Rumania, Turqia, Franca, Gjermania, Mali i Zi, Mbretëria e Bashkuar dhe Shtetet e Bashkuara, duke u përqendruar në operacionet e mbështetjes së paqes në një mjedis shumëkombësh”, thuhet në komunikatën e NATO-s.
Komandanti i Komandës së Forcave të Përbashkëta Aleate në Napoli, Admirali George M. Wikoff, e ka cilësuar ushtrimin si sukses të jashtëzakonshëm.
“Ky ushtrim demonstroi profesionalizmin, ekspertizën dhe gatishmërinë e Forcave të Armatosura Serbe që punojnë së bashku me trupat aleate. Duke u stërvitur së bashku, ne përmirësojmë ndërveprimin, ndërtojmë besim të ndërsjellë dhe forcojmë aftësinë tonë për t’iu përgjigjur në mënyrë efektive sfidave të përbashkëta të sigurisë. Ne të gjithë kemi punuar për këtë për një kohë të gjatë dhe personalisht jam i kënaqur që ushtrimi ka qenë një sukses kaq i jashtëzakonshëm në të gjitha aspektet. Është një meritë për të gjithë të përfshirët dhe një moment i madh ndërsa ndërtojmë së bashku të ardhmen tonë të partneritetit.”, ka thënë ai.
NATO thekson se ushtrimi “u zhvillua në respekt të plotë të politikës së deklaruar të neutralitetit ushtarak të Serbisë dhe pasqyron bashkëpunimin praktik afatgjatë midis NATO-s dhe Serbisë”.
“Ushtrimi i këtij viti NATO-Serbi përfaqëson një demonstrim të prekshëm se sa larg janë rritur marrëdhëniet NATO-Serbi. Sa shumë është zhvilluar partneriteti i Serbisë me NATO-n. Dhe sa shumë ka përparuar dialogu ynë politik dhe bashkëpunimi praktik”, tha Zëvendës Ndihmës Sekretari i Përgjithshëm i NATO-s për Çështjet Politike dhe Politikën e Sigurisë, Ambasadori Kevin Hamilton. “Ndërsa shikojmë përpara, NATO është e gatshme të zhvillojë më tej marrëdhëniet tona me Serbinë. Në respekt të plotë të politikës së saj të deklaruar të neutralitetit ushtarak”, ka shtuar Wikoff.
