Vetëm disa ditë para zgjedhjeve të jashtëzakonshme parlamentare në Kosovë, te rreth rrotullimi në hyrje të Mitrovicës së Veriut janë vendosur tabela me emrat „Zoran Gjingjiq“ dhe „Isa Boletini“.
Ministrja e Planifikimit Hapësinor në detyrë teknike, Fitore Pacolli, ka deklaruar se 88 rrugë në Mitrovicën e Veriut kanë marrë emra të rinj dhe se emrat e rinj janë zgjedhur në bashkëpunim me administratën e mëparshme në Mitrovicën e Veriut.
Sipas saj, komiteti është marrë intensivisht për dy muaj me çështjen e emërtimit të rrugëve të reja.
„Është votuar në Kuvend dhe tani po i vendosim (emrat), sepse bëhet fjalë për një procedurë teknike“, ka deklaruar ajo.
Në pyetjen e gazetarëve se ku ndodhet kryetari i komunës së Mitrovicës së Veriut, Millan Radojeviq, Pacolli ka deklaruar se bëhet fjalë për një projekt të Ministrisë së Planifikimit Hapësinor.
“Çfarëdo projekti që e bëj, e bëj si ministre, jo me komunën, sepse komuna tashmë e ka marrë këtë vendim”, tha ajo, duke shtuar se si ministre është e obliguar ta përfundojë pjesën teknike të punës.
Duke komentuar faktin se vendimin për ndryshimin e emrave të rrugëve e ka marrë administrata e mëparshme komunale e udhëhequr nga Erden Atiq, Pacolli tha se Kuvendi i ka respektuar dëshirat e qytetarëve të Mitrovicës së Veriut, duke shtuar se është e rëndësishme të respektohen dëshirat e çdo qytetari.
“Ka qenë vendimi i serbëve këtu që të mos marrin pjesë në zgjedhje dhe ata morën një kryetar komune shqiptar. Tani kanë një kryetar komune serb”, tha ajo, duke theksuar se në Mitrovicën e Veriut jetojnë si serbë ashtu edhe shqiptarë.
Sipas saj, qytetarët e Mitrovicës së Veriut janë të informuar për projektin.
“Njerëzit që jetojnë në Mitrovicë, këtu në Mitrovicën e Veriut, e dinë për projektin, kanë qenë të njoftuar. Kuvendi ka punuar për këtë vitin e kaluar së bashku me qytetarët e Mitrovicës së Veriut”, ka thënë Pacolli.
Ajo u ndal edhe te emrat e rinj të rrugëve, duke thënë se ndër ta ka edhe emra shkrimtarësh serbë, aktorësh dhe personalitetesh të tjera të njohura. Pacolli gjithashtu ka theksuar se koha e ndryshimeve të emrave të rrugëve nuk ka lidhje me zgjedhjet, por se ministria po vazhdon të kryejë punën e saj. Sipas saj, akuzat se po merr pjesë në fushatë politike vijnë edhe nga vende të tjera në Kosovë, gjë të cilën ajo e ka mohuar.
