Kryeministri në detyrë, Albin Kurti, ka prezantuar aderimin më të ri në Vetëvendosje vetëm 2 ditë para zgjedhjeve parlamentare, raporton Gazeta Online Veriu.info.
Ai i ka uruar mirëseardhje Mendurim Preshevës i cili ka shërbyer për 3 vite si zëdhënës i komunës së Preshevës.
Postimi i plotë:
Mirësevjen në Lëvizje, Mendurim!
Mendurim Presheva është jurist me përgatitje universitare në drejtësi dhe marrëdhënie ndërkombëtare, si dhe me përvojë në administratë publike dhe përfaqësim institucional. Ai ka shërbyer për gati tre vjet si zëdhënës i Komunës së Preshevës, ka bërë punë praktike në Ministrinë e Punëve të Jashtme dhe Diasporës në Kosovë si dhe aktualisht është asambleist në Kuvendin Komunal të Preshevës. Mendurimi ka qenë po ashtu pjesë e Alternativës për Ndryshim ku ka kryer funksione e detyra të ndryshme, si Nënkryetar, zëdhënës dhe tani si Sekretar i Përgjithshëm i këtij subjekti nga Lugina. Më herët ka drejtuar Shtëpinë e Kulturës “Abdulla Krashnica” në Preshevë.
Mendurimi është djali i profesorit të nderuar, Avni Presheva, dhe i poetes së parë që botoi libër në trojet shqiptare nën ish-Jugosllavi, Sadete Emërllahu Presheva.
