Tifozët e Botërorit 2026 që do të ndjekin ndeshjet në SHBA dhe Kanada po përballen me një tjetër ndryshim në rregulloret e stadiumeve.
Sipas raportimeve, FIFA kishte vendosur fillimisht një ndalim për futjen e shisheve bosh të ujit në stadiumet e turneut, gjë që shkaktoi shqetësime për sigurinë dhe rehatinë e tifozëve, sidomos duke marrë parasysh kushtet e nxehta në disa qytete pritëse.
Por pas presionit publik, FIFA ka bërë një kthesë në vendim dhe ka lejuar që tifozët të sjellin shishe uji të mbyllura fabrikisht deri në 590 ml.
Sipas Adam Crafton nga “The Athletic”, politika fillimisht ishte ndryshuar më 2 qershor për të hequr lejen për shishe plastike bosh, që do të thoshte se tifozët do të mund të blinin vetëm pije nga pikat brenda stadiumeve.
Kjo ishte parë si një vendim i lidhur me të ardhurat komerciale, pasi FIFA përfiton nga shitjet në stadiume dhe partneri i saj “Coca-Cola” do të shesë pije, përfshirë produktin e ujit “Dasani”.
Më pas, një video nga shefi operativ i Kupës së Botës 2026, Heimo Schirgi, konfirmoi se tifozët do të lejohen të sjellin shishe të mbyllura deri në 590 ml.
Megjithatë, ende nuk është konfirmuar nëse ky rregull do të vlejë edhe për stadiumet në Mexico, përfshirë “Estadio Azteca”, “Estadio BBVA” dhe “Estadio Akron”.
Turneu i vitit 2026 do të jetë i zgjeruar për herë të parë në 104 ndeshje, me 16 stadiume pritëse në total.
Disa ndeshje do të zhvillohen në Toronto dhe Vancouver në Kanada, ndërsa pjesa më e madhe do të mbahet në SHBA, përfshirë finalen në “MetLife Stadium” më 19 korrik.
