Një rast i dyshuar i ngacmimit seksual ndaj një nxënëseje të mitur ka tronditur komunitetin e Shkollës Amerikane në Shkabaj të Obiliqit, ku autoritetet kanë arrestuar një person që punonte si shofer pranë këtij institucioni arsimor.
Sipas burimeve të Sinjalit, rasti është raportuar më 8 qershor 2026 nga një punonjëse e shkollës, e cila ka njoftuar Policinë lidhur me dyshimet për ngacmim ndaj një nxënëseje të mitur.
Pas pranimit të informacionit, njësitë relevante policore kanë ndërmarrë veprimet e nevojshme hetimore dhe kanë intervistuar palët e përfshira në rast.
Si i dyshuar është arrestuar Rr. L, i cili ishte i angazhuar si shofer pranë Shkollës Amerikane në Shkabaj.
Gjatë trajtimit të rastit është intervistuar e mitura që dyshohet se ka qenë viktimë e ngacmimit, si dhe dëshmitarja që ka raportuar ngjarjen.
Me vendim të Prokurorit kujdestar, pas përfundimit të procedurave fillestare policore, i dyshuari është ndaluar për 48 orë dhe është dërguar në Qendrën e Ndalimit.
Rasti është iniciuar për veprën penale “Ngacmim seksual”, ndërsa hetimet janë duke vazhduar për zbardhjen e plotë të të gjitha rrethanave të ngjarjes.
Për shkak se rasti përfshin një të mitur, Sinjali nuk publikon identitetin e viktimës.
