Profesori i filozofisë, Blerim Latifi, ka shkruar për rrugën e vendeve të rajonit drejt BE-së dhe faktin që tashmë Shqipëria është favorite për anëtarësim para Malit të Zi dhe Serbisë.
Latifi thotë se ky avancim i pozitës së Shqipërisë ka ardhur falë punës së institucioneve shqiptare.
Megjithatë sipas tij, tashmë kur Shqipëria ndodhet në një pozitë të tillë, qarqe të ndryshme janë angazhuar për të dëmtuar reputacionin e shtetit shqiptar dhe sipas Latifit “shqiptarët mashtrohen lehtë edhe me kauza të rreme”.
Postimi i plotë:
Në disa projeksione të Bashkimit Europian për integrimin e vendeve të Ballkanit Perëndimor, Serbia dhe Mali i Zi konsideroheshin kandidatët më të avancuar për anëtarësim, ndërsa Shqipëria renditej në një valë të dytë zgjerimi.
Mirëpo, zhvillimet e viteve të fundit e patën ndryshuar ndjeshëm këtë projeksion.
Falë reformave dhe orientimit të qartë euroatlantik, Shqipëria ka avancuar në grupin e parë të kandidatëve potencialë për anëtarësim, ndërsa Serbia ka humbur terren për shkak të problemeve në demokratizim, afrimit me Rusinë dhe mungesës së progresit në normalizimin e marrëdhënieve me Kosovën.
Sot, gjithnjë e më shumë zëra në Bashkimin Europian flasin për mundësinë që deri në vitin 2030 Shqipëria dhe Mali i Zi të bëhen anëtarët e rinj të BE-së.
Dhe pikërisht këtu lind shqetësimi i disa qarqeve: si mund të tolerohet që Shqipëria të hyjë në Bashkimin Europian para Serbisë?
Prandaj, ngrihuni ta ndalim Shqipërinë. Ta ndezim edhe një herë nga brenda. T’ia hapim plagët e vjetra. Ta destabilizojmë, e qoftë e mundur edhe ta kthejmë pas. Pretekste ka sa të duash. Edhe shqiptarë që mashtrohen lehtë me kauza të rreme, po ashtu.
