Ish-drejtori në Komunën e Prishtinës, Sokol Havolli, ka shpërndarë një postim të ministrit në detyrë të Vetëvendosjes, Dimal Basha, i cili e akuzonte kryetarin e Prishtinës, Përparim Rama, për manipulim lidhur me rastin e aksidentit tragjik në Autostradën “Ibrahim Rugova”.
Në reagimin e tij, Havolli që ishte shkarkuar nga pozita e drejtorit, nga kryetari i Prishtinës, qëndron në një linjë me etiketimin e Bashës, se Rama është manipulues, por ka akuzuar ministrin në detyrë për përgjegjësi penale në gjendjen e rrugëve.
“Për që Rama manipulon, është e saktë, ama edhe viktimat e autostradës janë përgjegjësi e jotja, Dimal. Prandaj, Dimal Basha ke përgjegjësi penale, sepse vdekjet në autostrada e rrugë nacionale janë nga defektet e paralajmëruara shumë herë; duhet të ndiqesh penalisht. S’ke përgjegjësi morale, por penale”, ka shkruar Havolli.
Më herët, Basha kishte reaguar ndaj deklaratave të Ramës për kontratën milionëshe që lidhet me punimet në autostradë, duke e akuzuar atë për keqinterpretim të projektit.
“Pra nuk bëhet fjalë për ‘heqje dheu’, siç po manipulon kryetari Rama dhe siç është raportuar në disa portale, por për projekte të sanimit të plotë të skarpatave në tri segmente të autostradës”, kishte shkruar Basha.
