Koloneli anglez Chris Warren ka vizituar së bashku me familjen e dëshmorit Shemsi Istrefi vendin ku ra heroikisht dëshmori, Majdanin e Trepçës, si dhe bëri homazhe tek varret e dëshmorëve në Kompleksin Memorial të UÇK-së në Dumnicë, raporton Gazeta Online Veriu.info.
Ai është pritur nga vëllait i dëshmorit Shemsi Istrefi, Sami Istrefi, i cili ka vlerësuar lartë respektin nga koloneli anglez që kishte hyrë në Kosovë më 12 qershor 1999.
“Bashkëbisedimi i ngrohtë dhe respekti i tij i sinqertë për vlerat e luftës sonë çlirimtare na e lehtësuan dhimbjen që mbajmë në zemër, por mbi të gjitha na e shtuan krenarinë si familje dhe si komb që patëm nderin të japim kontributin tonë për lirinë e atdheut.” – shkruan Istrefi.
Kjo vizitë erdhi pak para përvjetorit të çlirimit të Vushtrrisë.
Njoftimi i plotë i tij:
Pak para përvjetorit të çlirimit të qytetit tonë, Vushtrrisë, u nderuam jashtëzakonisht nga vizita e Kolonelit anglez, Chris Warren, pikërisht në Mejdan, të Trepçës, aty ku ra heroikisht vëllai ynë, Shemi.
Vizita dhe nderimi i kolonelit anglez, i cili hyri në Kosovë më 12 qershor 1999, duke u bashkuar me ushtrinë çlirimtare, si dhe homazhet që ai bëri pranë varreve të dëshmorëve në Kompleksin Memorial të UÇK-së në Dumnicë, na bënë të ndihemi thellësisht të nderuar dhe krenarë.
Bashkëbisedimi i ngrohtë dhe respekti i tij i sinqertë për vlerat e luftës sonë çlirimtare na e lehtësuan dhimbjen që mbajmë në zemër, por mbi të gjitha na e shtuan krenarinë si familje dhe si komb që patëm nderin të japim kontributin tonë për lirinë e atdheut.
Për ne, kjo vizitë ishte më shumë se një gjest respekti, ishte një dëshmi e gjallë se sakrifica e dëshmorëve tanë vazhdon të nderohet, të vlerësohet dhe të kujtohet nga miqtë tanë ndërkombëtarë.
Pa asnjë dyshim, lufta e lavdishme e UÇK-së dhe ndërhyrja vendimtare e NATO-s përbëjnë një nga kapitujt më të ndritur të historisë së kombit shqiptar, një kapitull të shkruar me gjak, sakrificë, dinjitet dhe dashuri për lirinë.
Lavdi e përjetshme dëshmorëve të kombit!
