Valët e të nxehtit tropikal që kanë përfshirë Francën kanë shkaktuar panik dhe dyndje të qytetarëve nëpër dyqane, të cilët po përpiqen të sigurojnë pajisje ftohëse si ventilatorë dhe kondicionerë.
Situata më e rënduar është regjistruar në disa qytete, përfshirë zonën pranë Chambray-lès-Tours, ku sipas raportimeve të “Sud Ouest”, qytetarët kanë nisur të presin në radhë që në orët e para të mëngjesit për të blerë pajisje ftohëse. Raftet me ventilatorë më të lirë janë boshatisur brenda pak minutash pas hapjes, ndërsa janë raportuar edhe lëndime të lehta si pasojë e shtyrjeve mes blerësve.
Skena të ngjashme janë shënuar edhe në një dyqan në zonën La Défense në Paris, ku oferta për kondicionerë portativë me çmim 179 euro ka shkaktuar fluks të madh blerësish dhe kaos në ambientet e dyqanit.
Franca po përballet me temperatura ekstreme që në disa zona kanë arritur deri në 40–45 gradë Celsius, ndërsa autoritetet raportojnë edhe pasoja të rënda në shëndetin publik. Sipas raportimeve, 55 persona kanë humbur jetën si pasojë e valës së të nxehtit.
Në rrjetet sociale janë shpërndarë gjerësisht pamje dhe rrëfime të qytetarëve për jetesën në kushte ekstreme të vapës, përfshirë edhe raste të pazakonta si ai i një banori të Parisit që u bë viral pasi arriti të skuqte vezë në një tigan të lënë pranë dritares së shtëpisë së tij.
Për shkak të situatës, autoritetet në Paris kanë vendosur masa të përkohshme kufizuese, përfshirë ndalimin e shitjes dhe konsumimit të alkoolit në hapësira publike, masë që nuk përfshin restorantet dhe baret.
