Një prind i është drejtuar redaksisë së Insajderit me një sërë ankesash lidhur me kushtet në Klinikën e Pediatrisë në Qendrën Klinike Universitare të Kosovës.
Qytetari, fëmija i të cilit është duke u trajtuar në njërin nga repartet e kësaj klinike, ka thënë se, përveç shqetësimit për gjendjen shëndetësore të fëmijës, ata po përballen edhe me një varg problemesh të tjera.
Sipas tij, në klinikë mungojnë kushtet bazë që duhet t’i ketë një institucion spitalor, si shtretër të përshtatshëm, kondicionerë funksionalë, jorganë, jastëkë, tualete të pastra dhe frigoriferë për ruajtjen e ushqimit të fëmijëve.
Prindi, i shqetësuar për gjendjen, ka deklaruar për Insajderin se në repartin e gastroenterologjisë, pavarësisht temperaturave të larta, kondicionerët në dhoma nuk vihen në funksion. Sipas tij, stafi arsyetohet se nuk i kanë telekomandat për t’i ndezur.
Ai ka treguar gjithashtu se shtretërit ku prindërit janë të detyruar të qëndrojnë (pasi fëmijët janë të vegjël) janë në gjendje shumë të keqe dhe të papërshtatshme. Madje, sipas tij, ka raste kur prindërit janë detyruar të flenë edhe në dysheme. Ai pretendon se në repart mungojnë edhe jorganët, jastëkët, madje edhe karriget.
Po ashtu, sipas tij, gjendja në tualetet e klinikës është shumë e rëndë. Ai ka rrëfyer se higjiena lë shumë për të dëshiruar, ndërsa në disa raste edhe rubinetët nuk kanë qenë funksionalë.
Ai ka dërguar këtë apel:
Apel publik për kushtet në Klinikën e Pediatrisë – Reparti i Gastroenterologjisë (QKUK)
Po e bëj këtë ankesë publike sepse kushtet në të cilat po trajtohen fëmijët dhe po qëndrojnë prindërit janë të papranueshme.
Në repart mungojnë kushtet elementare. Krevatet për prindërit janë të papërshtatshëm për fjetje, ndërsa në shumë dhoma mungojnë jorganët, jastëkët dhe madje edhe karriget. Klimatizimi nuk funksionon si duhet, duke e bërë të padurueshme temperaturën, sidomos gjatë ditëve të nxehta.
Banjot janë në gjendje shumë të keqe, me mungesë të kushteve bazë të higjienës. Në shumë raste nuk ka as rubineta (fontana) funksionale apo pajisje të mjaftueshme për larje dhe mirëmbajtje.
Një tjetër problem serioz është mungesa e frigoriferëve. Prindërit detyrohen të blejnë ushqim për fëmijët, por për shkak të temperaturave të larta ai prishet brenda pak orësh, duke rrezikuar shëndetin e fëmijëve.
Përveç këtyre, vërehet edhe mungesë stafi, gjë që e vështirëson edhe më shumë ofrimin e kujdesit për pacientët.
Fëmijët e sëmurë meritojnë të trajtohen në kushte të pastra, të sigurta dhe dinjitoze. I bëjmë thirrje Ministrisë së Shëndetësisë, SHSKUK-së dhe menaxhmentit të QKUK-së që të dalin në terren, të shohin nga afër gjendjen dhe të ndërmarrin masa urgjente për përmirësimin e kushteve.
Kjo nuk është ankesë kundër stafit shëndetësor që punon me përkushtim në kushte të vështira, por një kërkesë për kushte minimale dhe dinjitoze për fëmijët dhe familjarët e tyre.
