Bekim Haxhiu nga PDK ka ngritur pikëpyetje me procesin e votimit nga KQZ duke thënë se a është ky institucion transparent apo “sekret”, transmeton Gazeta Online Veriu.info.
“Deputetët zgjidhen nga vota e qytetarëve, jo nga numëruesit apo nga gabimet në regjistrimin ose numërimin e votave. Prandaj, rezultati duhet të jetë i saktë. Çdo pasaktësi duhet të verifikohet dhe të eliminohet plotësisht përpara certifikimit të rezultatit zgjedhor”, ka shkruar ndër të tjera Haxhiu.
Postimi i plotë;
KQZ, institucion transparent apo “sekret”?
Komisioni Qendror i Zgjedhjeve ka obligim ligjor që procesin zgjedhor ta administrojë me transparencë, saktësi dhe llogaridhënie.
Çdo votë duhet të numërohet dhe të regjistrohet ashtu siç është dhënë nga votuesi, sepse vullneti i qytetarëve është themeli i legjitimitetit të zgjedhjeve.
Megjithatë, pas procesit të rinumërimit, kanë mbetur disa pyetje që kërkojnë përgjigje publike:
1. Pse KQZ nuk e ka publikuar raportin e plotë të Sekretariatit për rinumërimin e 28,699 votave të subjekteve politike, ku janë evidentuar 2,831 vota preferenciale të kandidatëve për deputet, të regjistruara gabimisht gjatë numërimit fillestar në QKN?
2. Pse nuk është bërë publik emri i secilit kandidat, të cilit i janë shtuar ose hequr vota pas rinumërimit?
3. Pse raporti i Sekretariatit nuk përmban tabela të detajuara me ndryshimet e votave për secilin kandidat, por vetëm interpretime dhe përmbledhje?
4. Pse PZAP-së nuk i është paraqitur një pasqyrë e plotë dhe e detajuar e ndryshimeve të votave të kandidatëve?
Sipas raportit të Sekretariatit të KQZ-së, nga votat preferenciale të rinumëruara janë evidentuar këto pasaktësi në regjistrim:
LVV: 1,066 vota të regjistruara gabimisht në QKN nga 9,957 vota të rinumëruara në QNR apo (10.7%).
PDK: 557 vota të regjistruara gabimisht nga 5,201 vota të rinumëruara në QNR apo (10.7%).
LDK: 563 vota të regjistruara gabimisht nga 4,267 vota të rinumëruara në QNR apo (13.2%).
AAK: 232 vota të regjistruara gabimisht nga 2,092 vota të rinumëruara në QNR apo (11.1%).
Në total, nga 28,699 vota të rinumëruara janë konstatuar 2,831 vota preferenciale të kandidatëve, të regjistruara me pasaktësi gjatë numërimit fillestar.
Nga ana tjetër, KQZ ka deklaruar se marzhi i gabimit në rezultatin përfundimtar të votave preferenciale të kandidatëve është rreth 1.4%.
Rezultati i zgjedhjeve me lista të hapura nuk mund të certifikohet as me gabim 1.4%, as me gabim 10.7%.
Besimi në procesin zgjedhor nuk ndërtohet me interpretime, por me transparencë, rinumërim dhe saktësi të plotë.
Deputetët zgjidhen nga vota e qytetarëve, jo nga numëruesit apo nga gabimet në regjistrimin ose numërimin e votave.
Prandaj, rezultati duhet të jetë i saktë. Çdo pasaktësi duhet të verifikohet dhe të eliminohet plotësisht përpara certifikimit të rezultatit zgjedhor.
