Kryetari i Mitrovicës, Faton Peci ka shprehur ngushëllime për vdekjen e veprimtarit, Ali Peci.
Peci ka shkruar se gjithë jetën e tij ia kishte kushtuar çështjes kombëtare.
Postimi i plotë:
Lamtumirë, shqiptar i madh, Ali Xhemë Peci
Dje, në Londër, ka ndërruar jetë Ali Peci, patrioti i madh nga Zhazha, tri herë i burgosur politik, i cili tërë jetën ia kushtoi çështjes kombëtare.
Në vitin 1947, regjimi komunist jugosllav ia pushkatoi babain e Aliut, Xhemë Zhazhën. Ai e përjetoi këtë dhimbje shumë i ri, por dhimbja iu shndërrua në forcë e atdhedashuri, duke ndjekur frymën patriotike të babait të tij dhe të trevës që e rriti, s’ka si të ishte ndryshe sepse, në gjenealogjinë e fshatrave Zhazhë e Boletin patriotë ndër gjenerata kishte.
Me profesion mësues i gjuhës dhe letërsisë shqipe, Ali Peci edukoi breza të tërë në shumë shkolla të Kosovës: Vllahi , Bistricë, Boletin, Shajne të Kaçanikut, Prelluzhë, Stanoc i Epërm, Tugjec.
Së bashku me Shaban Shalën, Emrush Bejtën dhe Selim Buzokun, ishte bashkëthemelues i organizatave politike si “Balli Kombëtar” dhe “Çlirimi i Shtetit Shqiptar nën Flamurin Kuq e Zi”, ai asnjëherë nuk pushoi së vepruari për çështjen kombëtare.
Nana ime ka pas nderin e fatin ta ketë mësues Aliun, e sot me krenari ua përcjell nipave e mbesave të saj poezitë e tij e në veçanti atë “Shqiptar”.
Një nga ngjarjet që ende jeton në kujtesën e dhimbshme të familjes sime, përmendet se si familja e Aliut erdhi te gjyshi im, Zeqiri, për të kërkuar ndihmë që ta sjellnin Aliun nga burgu në shtëpi, të cilëve ua ofroi një kalë si mjet transporti. Aliu, nga një burrë i zoti, i gjatë, 2 metra e i fuqishëm, kur u kthye nga burgu ishte vetëm 38 kilogramë, nga dhuna që përjetoi por prap i pathyeshëm.
Amaneti i tij po çohet në vend, e trupi i tij do të pushojë i qetë në vendlindje, Zhazhë, pranë varrit të babait, Xhemë Zhazhës.
I përjetshëm qoftë kujtimi për ty Ali Peci, ashtu siç ishte vepra patriotike e kombëtare!
