Deputeti i zgjedhur i Partisë Demokratike të Kosovës, Arben Mustafa ka reaguar ndaj shkrimit të ministrit në detyrë të Financave, Hekuran Murati lidhur me parashikimet për rritjen ekonomike.
Murati deklaroi se Kosova pritet të jetë ndër top vendet me rritjen ekonomike më të shpejt gjatë viteve të ardhshme.
Por, Mustafa i ka lexuar ndryshe shifrat e publikuara nga Murati.
“Hekuran Murati po mburret me stagnimin ekonomik. Sot ai iu referua një raporti që parashikon se rritja ekonomike e Kosovës do të rritet nga 3.5% këtë vit në vetëm 3.95% deri në vitin 2031. Kjo nuk është arsye për t’u mburrur. Kjo tregon se kjo qeveri nuk ka ambicie për zhvillim”, ka shkruar Mustafa.
Ai ka thënë se kjo normë është më e ulët se rritja ekonomike që Kosova kishte para ardhjes së Vetëvendosjes në pushtet dhe sipas tij, është larg asaj që i duhet vendit për ta ndryshuar realisht jetën e qytetarëve.
“Në vend të politikave që tërheqin investime, rrisin prodhimin dhe krijojnë vende pune që paguhen mirë, kjo qeveri është përcaktuar ta administrojë varfërinë përmes ndihmave që jepen kohë pas kohe. Me këtë qeveri, nuk pritet zhvillim”, ka shtuar Mustafa.
