Rasti ka filluar më 2 qershor, kur përmes para-deklarimit në Terminalin Doganor në Mitrovicë, importuesi kishte deklaruar mall për zhdoganim pa specifikuar markën tregtare të produkteve.
Bazuar në analizën e riskut dhe përzgjedhjen për kontroll fizik e dokumentar nga sistemi i menaxhimit të riskut të Doganës së Kosovës, dërgesa është përzgjedhur për ekzaminim të detajuar. Gjatë kontrollit nga zyrtarët doganorë janë identifikuar elemente që ngritën dyshime të bazuara për shkelje të të drejtave të pronësisë intelektuale.
Në vijim të procedurës, Sektori për Mbrojtjen e të Drejtave të Pronësisë Intelektuale në Doganën e Kosovës ka kontaktuar bartësin e së drejtës, i cili ka konfirmuar se mallrat e paraqitura për zhdoganim përbënin produkte që cenonin të drejtat e mbrojtura të pronësisë intelektuale.
Në përputhje me Ligjin Nr. 06/L-015 për Masat Doganore për Mbrojtjen e të Drejtave të Pronësisë Intelektuale, Dogana e Kosovës ka ndërmarrë masat e parapara ligjore, duke ndaluar lirimin e mallit, duke inicuar procedurën e kundërvajtjes doganore ndaj importuesit dhe procedurën për asgjësimin e mallrave që cenojnë të drejtat e pronësisë intelektuale.
Më 8 korrik, malli është asgjësuar nën mbikëqyrje të Doganës së Kosovës, në përputhje me procedurat dhe standardet ligjore në fuqi, duke garantuar që produktet të mos qarkullojnë në tregun e Republikës së Kosovës.
Veprimet janë ndërmarrë në zbatim të Ligjit Nr. 06/L-015 për Masat Doganore për Mbrojtjen e të Drejtave të Pronësisë Intelektuale, si dhe dispozitave përkatëse të Kodit Doganor dhe të Akcizave të Kosovës (Ligji Nr. 08/L-247). Rasti është proceduar si kundërvajtje doganore për shkak të dyshimit për shkelje të dispozitave të nenit 32, paragrafi 3, nënparagrafi 3.1 të Ligjit Nr. 06/L-015.
Dogana e Kosovës deklaron se mbetet e përkushtuar në zbatimin e legjislacionit që garanton mbrojtjen e të drejtave të pronësisë intelektuale, luftimin e tregtisë së mallrave të falsifikuara dhe mbrojtjen e konsumatorëve, bizneseve legjitime dhe konkurrencës së ndershme në treg. Përmes kontrolleve të bazuara në analizën e riskut dhe bashkëpunimit të ngushtë me bartësit e të drejtave të pronësisë intelektuale, Dogana vazhdon të kontribuojë në forcimin e sundimit të ligjit dhe mbrojtjen e interesit publik.
