Një tentim grabitjeje me armë në një argjendari në qendër të Gjilanit është parandaluar falë reagimit të pronarit dhe ndërhyrjes së shpejtë të Policisë, raporton Sinjali.
Sinjali mëson ekskluzivisht se i dyshuari është Diar Berisha (19-vjeç), i cili tashmë ndodhet në ndalim policor.
Sipas burimeve të Sinjalit, ngjarja ka ndodhur të hënën rreth orës 14:00 në argjendarinë “Halimi Gold”, në rrugën “Shatërvani” në Gjilan.
Dyshohet se 18-vjeçari ka hyrë në argjendari dhe, nën kërcënimin e një arme, ka tentuar të kryejë grabitjen, por është penguar nga pronari i lokalit, H.I. (34 vjeç). Pas dështimit të planit, ai është larguar me vrap në drejtim të qytetit.
Menjëherë pas raportimit për “grabitje në progres”, në ndjekje janë vënë njësitë patrulluese dhe hetuesit e Njësisë për Hetimin e Krimeve, të cilët kanë arritur ta lokalizojnë dhe arrestojnë të dyshuarin në rrugën “Sadulla Brestovci” në Gjilan.
Gjatë arrestimit, Policia ka sekuestruar një pistoletë me gaz të tipit “EKOL Jackal” të kalibrit 9 mm, një karikator të zbrazët, një kapelë-maskë, një çantë krahu, një motoçikletë (skuter) dhe një helmetë me ngjyrë hiri, të cilat dyshohet se janë përdorur gjatë tentim-grabitjes.
I dyshuari është intervistuar në prani të avokatit mbrojtës, ndërsa me aktvendim të Prokurorit të Shtetit i është caktuar masa e ndalimit prej 48 orësh.
Rasti është proceduar në Prokurorinë Themelore në Gjilan me kallëzim penal për veprën “Grabitje në tentativë”.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
