Prokuroria Themelore në Prizren ka ngritur aktakuzë ndaj Beqir Berishës, ish-drejtor i Kulturës, Rinisë dhe Sportit në Komunën e Suharekës, dhe Abedin Maliqaj, person përgjegjës i operatorit ekonomik “A.G.” Sh.P.K., nën dyshimin për keqpërdorime në realizimin e projektit “Ndërtimi i lapidarit për viktimat e viteve (1912-1945)” në fshatin Samadraxhë.
Sipas njoftimit të Prokurorisë, ish-drejtori në Suharekë, gjatë mandatit të Muharremajt, akuzohet për veprën penale “Keqpërdorimi i pozitës apo autoritetit zyrtar”, ndërsa A.M. për “Keqpërdorimi apo mashtrimi në prokurim publik”.
Aktakuza pretendon se ish-drejtori Berisha, në cilësinë e menaxherit të kontratës gjatë periudhës 23 shtator 2019 deri më 20 dhjetor 2021, ka tejkaluar kompetencat e tij me qëllim që t’i mundësojë përfitim operatorit ekonomik “A.G.” Sh.P.K.
Sipas Prokurorisë, ai ka nënshkruar pagesën prej 5 mijë eurosh në kuadër të kontratës me vlerë 28,650 euro, duke konstatuar se punimet ishin kryer sipas paramasës dhe parallogarisë, ndonëse ato nuk ishin realizuar në përputhje me kontratën dhe nuk ishte paraqitur kërkesë për kolaudim apo ndryshim të punimeve.
Prokuroria vlerëson se me këto veprime Komunës së Suharekës i është shkaktuar dëm material prej 5 mijë eurosh, i konfirmuar edhe nga ekspertiza e ndërtimtarisë.
Ndërkohë, sipas aktakuzës, Abedin Maliqaj., si person përgjegjës i operatorit ekonomik, nuk ka zbatuar detyrimet kontraktuale, por ka pranuar pagesën prej 5 mijë eurosh, edhe pse punimet nuk ishin realizuar sipas kontratës dhe specifikimeve teknike, duke përfituar mjete publike në mënyrë të kundërligjshme.
Prokurori i çështjes i ka propozuar gjykatës që, pas shqyrtimit dhe administrimit të provave, të pandehurit të shpallen fajtorë dhe të dënohen në përputhje me ligjin, nëse vërtetohen akuzat.
Akuza të mëhershme për Abedin Maliqajn, vëllain e ish-drejtorit të Bali Muharremajt
Gjykata Themelore e Prizrenit vjet kishte ngritur aktakuzë ndaj gjashtë zyrtarëve të Komunës së Suharekës dhe përfaqësuesit të operatorit ekonomik të cilët ishin të përfshirë në tenderin për ndërtimin e një rruge dhe të një ure metalike në këtë komunë.
Sipas aktakuzës, kompania përfituese, AM Group, kishte paraqitur në situacion punime të kryera për një urë metalike që në realitet as nuk kishin filluar. Përmes këtij raportimi të rremë, operatori ekonomik ka përfituar kundërligjshëm mbi 24 mijë euro nga buxheti i shtetit.
“Këtu është vërtetuar dashja dhe qëllimi i të pandehurve që të mundësojnë përfitim për operatorin ekonomik ‘AM Group’ Shpk për një punë të cilën nuk e ka kryer, por që e ka paraqitur kinse e ka përfunduar. Në këtë mënyrë është mundësuar përfitim i kundërligjshëm në shumë prej 24.308 euro”, thuhet në aktakuzën, të cilën e kishte siguruar Gazeta Insajderi.
Gazeta Insajderi kishte raportuar se pronari i kompanisë është vëllai i Driton Maliqajt, ish-drejtor i Drejtorisë së Administratës në Suharekë. Ai e ka mbajtur këtë pozitë pikërisht në kohën kur kompania e vëllait të tij kishte fituar tenderin në fjalë.
Përveç funksionit në komunë, Driton Maliqaj ka qenë edhe kandidat për deputet nga Aleanca për Ardhmërinë e Kosovës (AAK)./Veriu.info
