Kryetari i Bashkimit Demokratik për Integrim (BDI), Ali Ahmeti, ka deklaruar se ka informacione se Gjykata Kushtetuese ka iniciativa për të hapur rastet e Tribunalit të Hagës, përkatësisht aktakuzën ndaj Ushtrisë Çlirimtare Kombëtare (UÇK).
Ahmeti ka thënë se “hapja e plagëve të vjetra është më e dhimbshme sesa hapja e një të reje”.
Pas këtyre deklaratave ka reaguar Organizata e Veteranëve të Luftës së UÇK-së, e cila ka hedhur poshtë çdo përpjekje për hapjen e proceseve të Hagës kundër Ushtrisë Çlirimtare Kombëtare.
OVL e UÇK-së i ka cilësuar këto përpjekje si “manovra të revizionizmit politik”, që sipas saj synojnë ta paraqesin si kriminale një luftë të drejtë çlirimtare.
“Luftëtarët shqiptarë paguan çmimin që siguroi dinjitet, barazi dhe stabilitet. Plagët e vjetra nuk duhet të ngacmohen me qëllimin për të goditur vlerat e luftës apo për të destabilizuar rajonin”, thuhet ndër të tjera në reagimin e OVL-së, përcjell Gazeta Express.
Reagimi i plotë i OVL-së së UÇK-së:
“Organizata e Veteranëve të Luftës së UÇK-së hedh poshtë çdo përpjekje për hapjen e proceseve të Hagës kundër Ushtrisë Çlirimtare Kombëtare.
Këto janë manovra të revizionizmit politik, që synojnë ta shpallin kriminale një luftë të drejtë çlirimtare dhe të minojnë themelet e Marrëveshjes së Ohrit.
Luftëtarët shqiptarë paguan çmimin që siguroi dinjitet, barazi dhe stabilitet. Plagët e vjetra nuk duhet të ngacmohen me qëllimin për të goditur vlerat e luftës apo për të destabilizuar rajonin.
Qarqet shoviniste të Maqedonisë së Veriut nuk duhet të tentojnë shtrembërimin e historisë për hesapet e tyre politike.”
