Kryetari i Prishtinës, Përparim Rama, ka reaguar pas, siç e ka cilësuar ai, një fushatë denigruese dhe linçuese ndaj tij, bashkëpunëtorëve të tij dhe bashkëshortes së tij.
Rama ka thënë se sulmet e fundit kanë kaluar kufijtë e debatit politik dhe janë shndërruar në përpjekje për intimidim dhe presion.
“Kjo nuk është më politikë. Është çnjerëzore”, ka shkruar Rama në një reagim publik.
Ai ka deklaruar se për një kohë të gjatë është përballur me një “fushatë të orkestruar politike”, por sipas tij, ditët e fundit ajo ka marrë përmasa të reja, duke përfshirë edhe persona që nuk janë pjesë e përplasjeve politike.
“Kur një betejë politike zbret në shpifje, fyerje dhe denigrim të familjarëve e njerëzve që nuk janë pjesë e përplasjes politike, nuk kemi më debat demokratik dhe as llogaridhënie. Kemi një përpjekje të vetëdijshme për të frikësuar dhe për të ushtruar presion”, ka thënë Rama.
Kryetari i kryeqytetit ka theksuar se çdo pretendim që lidhet me interesin publik duhet t’u drejtohet institucioneve të drejtësisë, duke shtuar se kjo është rruga e vetme në një shtet demokratik.
“Mos e fshihni denigrimin, gjuhën e urrejtjes dhe linçimin prapa pretendimit për interes publik”, ka deklaruar ai.
Rama ka kritikuar edhe përdorimin e kësaj çështjeje në Asamblenë Komunale të Prishtinës, duke e cilësuar si tregues të degradimit të debatit publik.
“Përfshirja e tyre nuk është llogaridhënie. Nuk është interes publik. Është kalim i çdo kufiri njerëzor, moral dhe institucional”, ka shkruar ai.
Ai ka paralajmëruar se rasti do të trajtohet në institucionet e drejtësisë dhe se të gjithë ata që, sipas tij, kanë marrë pjesë në organizimin, nxitjen apo shpërndarjen e kësaj fushate do të identifikohen dhe do të mbajnë përgjegjësi.
“Shteti ligjor nuk mund të lejojë që linçimi dhe denigrimi të përdoren si instrumente të veprimit politik”, ka përfunduar Rama.
