Kompania ajrore GP aviation/ Prishtina Ticket që ia ka shtetit gjerman rreth 9 milionë euro, e të cilës Qeveria e Kosovës i mundësoi linja ekskluzive operimi, borxhe të shumta u ka edhe pasagjerëve të vetë.
Tashmë krejtësisht në pronësi të kosovarit Edvin Rrahmanaj, GP aviation del t’u ketë borxh qindra mijëra euro pasagjerëve të vet.
Vox Kosova ka siguruar përgjigje nga FlyHelp, platformë që merret me mbrojtjen e të drejtave të pasagjerëve në rastet e vonesave dhe anulimeve të fluturimeve.
Ulpian Leka nga Fly Help i ka thënë Vox-it se pagesat e pakryera kapin “shumën 6 shifrore”.
“GP Aviation ndjek një strategji sistematike zvarritjeje. Kundër çdo vendimi që nxjerrim në favorin tonë, kompania paraqet ankesë, edhe kur kjo nuk ka asnjë bazë ligjore reale“, tha Leka.
Jo veç zvarritja, edhe pasi pasagjerët fitojnë deri në gjykatë, kompania nuk i paguan.
“Agjensionet që shesin bileta për GP, si dhe vetë GP Aviation, i kontaktojnë shpesh pasagjerët drejtpërdrejt, duke u kërkuar mbylljen e rastit dhe duke u ofruar biletë falas ose pagesë të pjesshme si kompensim”.
Disa prej tyre natyrisht, kanë rënë pre e presionit…
“Ka pasur raste kur pasagjerët na janë lutur t’ua mbyllim rastin, pasi kishin frikë se nuk do të mund të fluturonin më me kompaninë”.
Megjithatë këto borxhe mund të shkaktojnë diçka krejt fatale për kompaninë që do të jetë përfituesja më e madhe e 2 milionëshit qe Kurti e shpërndau para zgjedhjeve.
“Bllokimi i avionit në terren gjithashtu nuk mund të përjashtohet. Ne supozojmë që GP Aviation mund të likuidohet përpara se të shlyhen të gjitha detyrimet, pasi mjetet për t’i paguar ato vështirë se mund të gjenden”.
Edhe më tutje, Ministria e Infrastruturës dhe Aeroporti nuk kanë treguar se cila kompani ajrore është përfituesja më e madhe e 2 milionëshit të Kurtit, teksa tashmë Vox Kosova i është drejtuar Agjencisë për Privatësi pasi institucionet refuzojnë ti japin këto të dhëna.
