Kryetarja e Kuvendit të Kosovës, Albulena Haxhiu, e cila është edhe u.d e Presidentit, ka reaguar lidhur me marshin e organizuar sot në qendër të Prishtinës.
Haxhiu ka thënë se falënderon organizatorët dhe qytetarët që dolën në shesh për të shprehur paqësisht qëndrimin që lufta e UÇK’së ishte e drejtë.
Ajo edhe më poshtë ka shkruar se marshi i sotëm tregon se qëndrimi shprehet fuqimisht duke ruajtur qetësinë e dinjitetin.
Reagimi i plotë:
Falënderoj organizatorët e Marshit për Liri dhe qytetarët që sot dolën në Prishtinë për ta shprehur paqësisht dhe me dinjitet një qëndrim që në Kosovë ka qenë dhe mbetet i qartë.
Lufta e Ushtrisë Çlirimtare të Kosovës ishte luftë e drejtë për çlirim. Ajo erdhi pas viteve të shtypjes dhe dhunës së një regjimi që përdori gjithë aparatin e vet shtetëror kundër shqiptarëve në Kosovë.
Marshi i sotëm tregoi se ky qëndrim mund të shprehet fuqishëm duke ruajtur njëkohësisht qetësinë dhe dinjitetin. Kështu i bëhet nder sakrificës së atyre që luftuan dhe Republikës që u ndërtua mbi atë sakrificë.
