Analisti Agon Maliqi ka thënë se protestat dhe shprehja e pakënaqësisë ndaj një verdikti kanë rëndësi, duke kundërshtuar pretendimet se ato nuk kanë ndikim ose mund të kenë vetëm efekt negativ.
Sipas tij, nëse qytetarët konsiderojnë se një vendim nuk ka prodhuar drejtësi, kjo pakënaqësi duhet të shprehet sa më shumë, veçanërisht nga shoqëria civile.
Maliqi ka kërkuar që zyrtarët e shteteve sponsore të gjykatës të informohen për nivelin e pakënaqësisë dhe efektet e veprimtarisë së saj.
Ai ka theksuar se kërkesa ndaj sponsorëve nuk nënkupton ndërhyrje në drejtësi, por forcim të besimit përmes kërkesës për llogaridhënie dhe mbikëqyrje.
“Mos i dëgjoni ata që ju thonë se protesta nuk ka ndikim, apo se ka ndikim negativ. Nëse mendoni se verdikti nuk ka prodhuar drejtësi, kjo gjë duhet të dëgjohet sa më shumë dhe sa më fort – e sidomos nga shoqëria civile. Është jetike që zyrtarët e shteteve sponsore të gjykatës ta kuptojnë nivelin e pakënaqësisë dhe efektin që e ka prodhuar gjykata. Kërkesa ndaj sponsorëve të gjykatës nuk është që të ndërhyhet në drejtësi, por pikërisht që të forcohet besimi në të. Që kësaj gjykate – e cila po vepron pa mekanizëm mbikëqyrës kontrolli dhe me mangësi të dokumentuara të veprimit – dikush t’i kërkojë llogari për standardet dhe të sigurohet mbikëqyrje. Që faza e apelit të mos jetë thjesht noterizim i shkallës së parë. Kësaj kërkese do të duhej t’i printe qeveria, por ajo me sa duket më shumë duket e interesuar për ta amortizuar pakënaqësinë”, ka deklaruar ai.
