Agjencia Qendrore e Prokurimit ka pranuar anulimin e vendimit për IP-KOS. Tenderi milionësh kthehet në rivlerësim pas kontestit me dokumentin e falsifikuar.
Agjencia Qendrore e Prokurimit është pajtuar që të anulohet vendimi për dhënien e kontratës në tri pjesë të tenderit për furnizim me karburante për IP-KOS-in.
Bëhet fjalë për lotet ku ishte rekomanduar IP-KOS dhe që së bashku kapin vlerën e parashikuar prej 6 milionë e 185 mijë eurosh.
Tenderi tash do të kthehet në rivlerësim.
Ky është zhvillimi më i ri në një rast që prej javësh është shoqëruar me konteste rreth një dokumenti të lidhur me British Petroleum.
AQP-ja kishte vendosur më 21 korrik 2026 për dhënien e kontratës.
Petrol Company, një nga kompanitë në garë, e kishte kundërshtuar këtë vendim.
Në qendër të ankesës ishte dokumentacioni me të cilin IP-KOS pretendonte se i plotësonte kushtet e tenderit.
Një nga dokumentet lidhej me furnizimin përmes kompanisë shqiptare Gega Oil dhe gjigantit britanik British Petroleum.
Petrol Company e kishte kontaktuar drejtpërdrejt British Petroleum-in në për ta verifikuar dokumentin.
Përgjigjja e BP-së, e ardhur më 6 gusht, e ndryshoi krejtësisht situatën.
“Faleminderit për emailin tuaj.”
“Mund të konfirmojmë se nuk e njohim letrën e përmendur në korrespondencën tuaj dhe po ndërmarrim hapat e duhur në përgjigje ndaj kësaj.”
Me këtë përgjigje, kontesti nuk kishte të bënte më vetëm me mënyrën se si duhej interpretuar një kusht i tenderit.
Tashmë shtrohej pyetja se si ishte pranuar dokumenti dhe sa ishte verifikuar para se të merrej vendimi për fituesin e tenderit.
Kushtet e tenderit kishin qenë të qarta.
Kompanive u kërkohej një garancion, autorizim ose konfirmim nga vetë rafineria apo prodhuesi prej të cilit furnizoheshin.
AQP-ja e kishte sqaruar këtë edhe më 20 maj.
“Nuk aprovohet. Tenderuesit i kërkohet një garancion, autorizim apo konfirmim nga rafineria ku furnizoheni.”
“Nuk pranohet nga çfarëdo distributori që nuk është rafineri.”
Dokumenti i kontestuar, sipas raportimeve të mëhershme të Nacionales, përmendte BP Oil International Limited dhe kompaninë Gega Oil.
Pas shpalljes së rezultatit, edhe AQP-ja i ishte drejtuar BP-së për verifikim.
Fillimisht, përgjigjja nuk kishte mbërritur brenda afatit të procedurës.
Por kur BP-ja u përgjigj më 6 gusht, eksperti i OSHP-së vlerësoi se bëhej fjalë për një fakt të ri dhe të rëndësishëm.
Sipas tij, kjo përgjigje prekte drejtpërdrejt çështjen nëse dokumenti ishte autentik dhe i vlefshëm.
Berat Buzhala kishte ngritur publikisht pyetjen pse ky verifikim nuk ishte bërë para se të shpallej fituesi.
Pas këtyre zhvillimeve, Petrol Company iu drejtua OSHP-së më 13 gusht.
Para kësaj, kompania kishte kërkuar rishqyrtim nga AQP-ja, por kërkesa ishte refuzuar më 3 gusht.
Më 28 gusht erdhi zhvillimi i rëndësishëm.
Eksperti i OSHP-së rekomandoi që ankesa e Petrol Company të pranohej si e bazuar.
Ai kërkoi anulimin e njoftimit për dhënien e kontratës dhe kthimin e tenderit në rivlerësim.
Pika kryesore është se më pas me këtë rekomandim u pajtua edhe vetë AQP-ja.
Dokumentet e OSHP-së tregojnë se më 2 shtator palët kishin deklaruar pajtimin me raportin e ekspertit.
Për këtë arsye, Paneli Shqyrtues i OSHP-së nuk pati nevojë të vendoste vetë nëse pretendimet e Petrol Company ishin të drejta.
Palët tashmë ishin pajtuar që procedura të kthehej prapa.
OSHP-ja e thotë këtë qartë në vendimin e 24 shtatorit.
“Andaj, paneli shqyrtues nuk është lëshuar fare në vlerësim të pretendimeve ankimore por vetëm nxjerrë vendim për përfundimin e procedurës.”
Eksperti i OSHP-së kërkoi anulimin dhe rivlerësimin, ndërsa AQP-ja e pranoi këtë rekomandim.
Në tri lotet e prekura janë miliona euro.
Lot 2 kishte vlerë të parashikuar prej 2,71 milionë eurosh.
Lot 5 vlente rreth 2,17 milionë euro, ndërsa Lot 7 rreth 1,305 milionë euro. Vendimi_2026-0596
Rasti ndërkohë ka kaluar edhe përtej procedurave të prokurimit.
Burime të Nacionales kishin bërë të ditur javë më parë se Prokuroria Themelore në Prishtinë e kishte marrë çështjen në shqyrtim.
Ajo që tashmë është vendosur është që dokumenti u kontestua, BP-ja tha se nuk e njihte atë dokument si të saj dhe eksperti kërkoi që vendimi të anulohej.
Në fund, edhe AQP-ja, institucioni që kishte marrë vendimin fillestar, pranoi që tenderi për këto tri lote të kthehej në rivlerësim.
