Kriza e Manchester Unitedit ka nxitur reagime të ashpra nga dy prej legjendave të klubit, Paul Scholes dhe Wayne Rooney.
Pas paraqitjeve zhgënjyese të fundit të “Djajve të Kuq”, të dy kanë kritikuar lojtarët, duke vënë në pikëpyetje angazhimin e tyre dhe aftësinë për ta përfaqësuar një klub me historinë e Unitedit.
Scholes e drejtoi kritikën kryesisht ndaj kapitenit Bruno Fernandes, ndërsa Rooney ishte edhe më i ashpër me të gjithë skuadrën, duke akuzuar futbollistët për mungesë sakrifice dhe përkushtimi në fushë.
Scholes e vë në dyshim kapitenin Bruno Fernandes
Ish-mesfushori i Manchester Unitedit kritikoi Bruno Fernandesin pas deklaratave të portugezit ndaj trajnerit Michael Carrick, pas humbjes së rëndë kundër Comos në Ligën e Kampionëve.
“Si mund t’i besojë dikush Bruno Fernandesit si kapiten të cilësdo skuadër ku do të luajë tani? Mendoj se ndoshta duhet të largohet nga futbolli evropian dhe të shkojë në Arabinë Saudite, thjesht të largohet nga kjo situatë”, deklaroi Scholes.
Ai vazhdoi me kritika të drejtpërdrejta ndaj kapitenit të Unitedit, duke vënë në dyshim besimin që trajnerët dhe stafi mund të kenë tek ai.
“Nuk mendoj se ndonjë trajner apo anëtar i stafit mund t’i besojë pas asaj që ndodhi”, shtoi ish-futbollisti anglez.
Rooney: “Unë të paktën vrapoja dhe luftoja për ekipin”
Wayne Rooney, një nga golashënuesit më të mëdhenj në historinë e klubit, nuk i kurseu kritikat për pjesën tjetër të skuadrës.
Ai tha se lojtarët aktualë nuk kanë argumente të forta për t’u mbrojtur nga kritikat, sidomos për mënyrën se si po paraqiten në fushë.
“Nuk mendoj se lojtarët kanë argumente të forta për t’u mbrojtur. Unë isha një lojtar që mund të shënoja gola dhe kisha cilësi, por të paktën vrapoja, punoja fort dhe angazhohesha për ekipin”, tha Rooney.
Ish-sulmuesi anglez shtoi se do të dëshironte të hynte në dhomën e zhveshjes për t’u kërkuar llogari futbollistëve.
“Do të doja të hyja atje, t’i ulja të gjithë dhe t’i pyesja: ‘Çfarë po bëni? Çfarë lloj paraqitjeje mendoni se është kjo? A mendoni vërtet se e meritoni ta vishni këtë fanellë, duke parë mënyrën se si lëvizni në fushë?’”, përfundoi Rooney.
Deklaratat e dy legjendave vijnë në një periudhë të vështirë për Manchester Unitedin, ku rezultatet e dobëta dhe tensionet rreth skuadrës kanë shtuar presionin mbi lojtarët dhe trajnerin Michael Carrick. /Express
