Kompania MONUNI SH.P.K. ka reaguar ashpër ndaj komunikatës së Agjencisë së Ushqimit dhe Veterinarisë (AUV), e cila më 1 nëntor njoftoi për konstatimin e aflatoksinave mbi kufijtë e lejuar në mbi 25 tonë misër dhe në ushqimin për viça të kompanisë nga Gjilani.
Në reagimin publik të publikuar sonte, MONUNI e akuzon AUV-në se nuk i ka paraqitur të gjitha rrethanat e rastit, duke krijuar, sipas saj, alarm të panevojshëm në opinion dhe duke dëmtuar reputacionin e kompanisë, raporton Veriu.info.
“Janë dy raste të ndara, të njoftuara bashkë. Ngarkesa e misrit nga Kroacia u ndal në kufi dhe nuk hyri kurrë në treg. Lotin e ushqimit për viça, jo për lopë qumështore, e kemi tërhequr nga qarkullimi. Asnjëri nga të dy rastet nuk prek produktet që arrijnë në tryezën tuaj, as qumështin, as mishin”, thuhet në reagimin e MONUNI-t.
Sa i përket mbi 25 tonëve misër nga Kroacia, për të cilin AUV kishte njoftuar se kishte konstatuar aflatoksinë B1 në nivel prej 30 µg/kg dhe aflatoksina totale prej 47 µg/kg, kompania MONUNI thotë se ngarkesa nuk është zhdoganuar dhe është kthyer te shitësi më 19 tetor.
MONUNI pretendon se misri kishte ardhur i shoqëruar me dokumentacion të plotë, përfshirë analizat e laboratorit të akredituar kroat “Inspecto d.o.o.”, të cilat, sipas kompanisë, para nisjes e kishin konfirmuar se produkti ishte brenda parametrave të lejuar.
Por, kompania ngre dyshime për mënyrën e realizimit dhe interpretimit të analizave nga institucionet kosovare.
“Shqetësimi ynë lind nga fakti se analiza fillestare dhe superanaliza kanë matur parametra të ndryshëm, aflatoksinën B1 dhe aflatoksinat totale, duke ngritur pikëpyetje mbi krahasueshmërinë e rezultateve”, thuhet në reagim.
MONUNI pretendon se, pavarësisht kërkesave të përsëritura, AUV nuk ia ka vënë në dispozicion raportet e plota laboratorike, duke ia kufizuar mundësinë për verifikim të pavarur, raporton Veriu.info
Ndërsa, për lotin prej 2,000 kilogramësh të ushqimit për viça, kompania thotë se e ka ndaluar produktin menjëherë pas pranimit të rezultatit laboratorik, më 8 tetor.
“Dita që morëm rezultatin, më 8 tetor, e ndaluam produktin. I gjithë loti është i izoluar dhe i mbajtur jashtë tregut, dhe kemi kërkuar që asgjësimi i tij të bëhet nën mbikëqyrjen e AUV-së”, thuhet në reagim.
MONUNI thekson se ushqimi ishte i destinuar për viça dhe jo për lopë qumështore, duke kundërshtuar paralajmërimin e AUV-së për mundësinë e kalimit të aflatoksinës në qumësht në formën e aflatoksinës M1.
“Në mish aflatoksina nuk grumbullohet: organizmi i kafshës e zbërthen dhe e nxjerr jashtë brenda pak ditësh”, pretendon MONUNI, duke iu referuar Institutit Gjerman për Vlerësimin e Rrezikut (BfR) dhe Manualit Veterinar Merck.
Kompania MONUNI e konsideron të tepruar mënyrën se si AUV e ka trajtuar komunikimin publik të rastit.
“Vlerësojmë se mënyra e hartimit dhe publikimit të komunikatës së AUV-së, veçanërisht theksimi i rrezikut kancerogjen pa një shpjegim të mjaftueshëm të rrethanave konkrete dhe nivelit të ekspozimit, është joproporcionale dhe krijon alarm të panevojshëm në opinionin publik”, thuhet në reagim.
Sipas MONUNI-t, AUV nuk ka pasqyruar masat e ndërmarra nga kompania, duke krijuar një perceptim të njëanshëm të rastit, shkruan Veriu.info
Ndryshe, në komunikatën e 1 nëntorit, AUV kishte njoftuar se analizat laboratorike të saj kishin konstatuar aflatoksinë B1 në nivel prej 30 µg/kg në misrin e importuar, ndërsa analizat e IKSHPK-së kishin konfirmuar aflatoksina totale prej 47 µg/kg, mbi vlerën referente prej 10 µg/kg.
Për produktin “Ushqim për viça deri 300 kg”, AUV kishte njoftuar se kishte konstatuar aflatoksinë B1 mbi nivelin e lejuar, duke ndaluar shitjen dhe urdhëruar tërheqjen e produktit nga qarkullimi.
Ndryshe, pronar i kompanisë Monuni Sh.P.K. nga Gjilani është Zijah Idrizi. Monuni Sh.P.K. në ARBK si aktivitet primar ka të regjistruar aktivitetet e veterinarisë, ndërsa aktivitet sekondar ka përpunimin e produkteve të drithërave.
Ndërkaq, AUV udhëheqet nga Drejtoresha Ekzekutive, Venera Çerkini dhe është agjencion nën menaxhim të Ministrisë së Bujqësisë.
Foto kryesore e lajmit: Zijah Idrizi – pronar i Monuni Sh.P.K. dhe Venera Çerkini – Drejtoreshë Ekzekutive e AUV.
LEXONI EDHE:
