Lojërat Mesdhetare “Prishtina 2030” janë shndërruar në temën kryesore të përplasjes politike mes kryetarit të kryqyetetit dhe ministrave të qeverisë Kurti, raporton Gazeta Online Veriu.info.
Përmes një reagimi publik, Rama ka kërkuar që të ndalen të pavërtetat dhe akuzat në Kuvend, duke theksuar se në vend të deklaratave politike nevojitet punë konkrete për realizimin e këtij organizimi.
Deputeti Basha dhe ministri Gashani po e përdorin foltoren e Kuvendit për me mashtru qytetarët dhe me e fsheh përgjegjësinë e Qeverisë përmes akuzave ndaj meje dhe Kryeqytetit”, ka shkruar Rama.
Në reagimin e tij, kryetari i Prishtinës ka ngritur shqetësime edhe për obligimet financiare dhe infrastrukturore, duke pretenduar se vonesat në pagesat ndaj Komitetit Ndërkombëtar dhe përpjekjet për ndryshimin e Masterplanit po e rrezikojnë organizimin e Lojërave.
Ai gjithashtu ka kritikuar kryeministrin Albin Kurti, duke e akuzuar se po e përdor këtë çështje për agjendë politike dhe po nxit përçarje mes qyteteve.
Në fund, Rama i ka bërë thirrje Qeverisë që të përmbushë obligimet e marra, duke theksuar se koha për realizimin e projektit po kalon.
“Qytetarët meritojnë t’i shohin Lojërat të realizohen me sukses dhe Kosovën të dalë faqebardhë para botës. Kuvendi meriton dinjitet. Qytetarët meritojnë të vërtetën. Kosova meriton që fjala e dhënë në emër të saj të mbahet”, ka shkruar Rama.
