Jo të gjithë ata që kanë planifikuar të bëhen studentë në Universitetin e Mitrovicës, do të mund ta bëjnë këtë në vitin e ardhshëm akademik, pasi që ky universitet po vazhdon të degradohet si pasojë e menaxhimit të dobët dhe renies së cilësisë, raporton Veriu.info
Kjo pasi që disa programe në fakultetet e Universitetit të Mitrovicës të drejtuar nga rektori Alush Musaj nuk janë akredituar nga Këshilli Shtetëror të Cilësisë i Agjencisë së Kosovës për Akreditim.
Veriu.info ka siguruar vendimin e Këshilli Shtetëror të Cilësisë, përmes të cilit është refuzuar akredimi i programeve: Financa dhe Kontabilitet (Master), Gjeoinformatikë dhe menaxhim i gjeoresurseve (Bachelor).
Po ashtu me këtë vendim është refuzuar ri-akreditimi i programeve: Makineri prodhuese (Master), Inxhinieri dhe teknologji ushqimore (Bachelor) dhe Inxhinieri dhe teknologji ushqimore (Master).
Ky vendim i Këshillit Shtetëror të Cilësisë i Agjencisë së Kosovës për Akreditim është marrë më datë 21.12.2021, në mbledhjen e mbajtur nën monitorimin e Ambasadës Shteteve të Bashkuara të Amerikës në Prishtinë dhe dy organizatave të shoqërisë civile në Kosovë, ORCA dhe BIRN.
Veriu.info sjellë ekskluzivisht për lexuesit e gazetës arsyet për refuzimin nga KSHC për akreditim të këtyre programeve.
KSHC ka shqyrtuar aplikacionet dhe ka bërë verifikimin e dokumentacionit dhe më pas ka gjetur mospërputhje duke refuzuar kësisoj programet e lartëcekura.
Në njërin program për të cilin UMIB kishte aplikuar për akreditim, si bartës i programit ishte vendosur emri i rektorit të këtij universiteti, Alush Musaj, dhe dy profesorë të tjerë, por sërish emri i rektorit nuk kreu punë për të siguruar akreditimin për programin Inxhinieri dhe Teknologji Ushqimore Msc.
Ky vendim i KSHC bazohet në faktin se titulli PhD i rektorit Alush Musaj dhe i bartësit tjetër Aziz Behrami nuk përkojnë me fushën e programit të studimit, kurse bartësi Bahtir Hyseni nuk posedon nostrifikimin e diplomës PhD.
KSHC nuk ka akredituar as programin Financa dhe Kontabilitet MA, pasi në verifikimin e dokumentacionit ka gjetur se titulli i bartësit të programit PhD Ajtene Avdullahi nuk përkon me fushën e programit të studimit.
Problemi i njëjtë ka rezultuar edhe në rastin e programit Makineri Prodhuese MSc, ku titulli i bartësit Labinot Kastrati nuk përkon me fushën e programit të studimit.
UMIB nuk u mjaftua vetëm me vendosjen e titujve joadekuat duke tentuar të p siguroi akreditimin, por tentoi edhe të mashtrojë KSHC duke vendosur si bartës të programit Gjeoinformatike dhe Menaxhimi i gjeoresurseve PhD Naser Peci dhe Phd Behxhet Shala duke i marrë nga programe tjera të akredituara dhe pa e njoftuar paraprakisht KSHC për një gjë të tillë.
Në programin Inxhinieri dhe Teknologji Ushqimore BSc, UMIB ka vendosur si bartës PhD Valdet Gjinovcin i cili figuron si i punësuar në të vende të ndryshme me orar të plotë. Po ashtu titujt e bartësve tjerë nuk përkojnë me fushën e programit të studimit.
Foto nga takimi i KShC-së ku është marrë vendimi
