Është pezulluar greva e minatorëve të minierës së Trepçës pas dy ditësh grevë urie me kërkesën për kthimin në punë të minatorëve të suspenduar në tetor të vitit 2021 tê cilët dyshohen se kanë sulmuar fizikisht U.D. e kryeshefit të ndërmarrjes “Trepça” Enis Abdurrahmani më 18.10.2021, raporton Gazeta Online Veriu.info.
Pezullimin e grevës e ka konfirmuar për Veriu.info njëri nga minatorët grevist i cili ka folur për gazetën në kushte anonimiteti.
“Po mund të konfirmoj se greva është pezulluar përkohësosht pasi kemi arritur një marrëveshje me shkrim me menaxhmentin e ndërmarrjes për kthimin në punë të minatorëve të suspenduar nga puna në tetor të vitit të kaluar.” – ka thënë minatori për Veriu.info.
Marrëveshja mes grevistëve dhe menaxhmentit është arritur dje pas dy ditësh grevë urie nga disa minatorë.
Veriu.info ka siguruar dokumentin ku u.d. i kryeshefit përmes një njoftimi drejtuar udhëheqësit të njësisë biznesore Minierat me Flotacion Stantërg, ku e njofton këtë të fundit se do të fillojnë procedurat disiplinore ndaj punëtorëve të kësaj ndërmarrje që janë të suspenduar përkohësosht.
Sipas kësaj marrëveshje me shkrim minatorët e suspenduar do të dalin para komisionit disiplonor më 28.02.2022.
Po ashtu Veriu.info mëson se menaxhmenti ka tërhequr edhe urdhëresën për suspendimin e minatorëve që grevojnë pa arsye.
Veriu.info do t’iu mbajë të informuar për të gjitha zhvillimet e mëtejme në Trepçë./Veriu.info/
