Qeveria e Kosovës ka emëruar Bordin e ri të ndërmarrjes “Trepça” pasi bordit të përkohshëm ka kohë që i ka skaduar mandati, raporton Gazeta Online Veriu.info.
Bahri Hyseni do të jetë kryesues i këtij bordi gjersa anëtarët tjerë do të jenë Ibrahim Krasniqi, Muharrem Peci, Bujar Bilalli dhe Xhevdet Tahiri.
Njëri nga të zgjedhurit në këtë pozitë, Xhevdet Tahiri, ka lidhje familjare me ish kandidatin për asamble të Mitrovicës nga lista e përbashkët VV – Guxo, Avni Tahirin.
Xhevdet Tahiri është djali i axhës së Avni Tahirit, anëtar i listës Guxo që në zgjedhjet e fundit lokale garoi bashkë me Lëvizjen Vetëvendosje.
Anëtari i ri i Bordit të Trepçës shihet në fotografi të shumta me kandidatin për asamblist.
Madje në postimet e tij shihet edhe momenti ku ka pritur në ambientet e Trepçës familjarët e tij që siç i ka quajtur “vllaznillaku” e ku shihet edhe anëtari i listës Guxo, Avni Tahiri.
Kjo fotografi është bërë në kohën kur Xhevdet Tahiri ushtroi pozitën e kryeshefit në ndërmarrjen “Trepça” për pak kohë.
Por si duket vardisjen politike Xhevdet Tahiri e ka pasur pasion të hershëm, pasi më herët shihet t’i ketë shpërndarë postimet e “të fortëve” të PDK-së, Kadri Veselit dhe deputetes Sala Berisha Shala./Veriu.info/.
