Presidentja e Kosovës, Vjosa Osmani, është pyetur sot për mundësinë e rikandidimit të saj për presidente të vendit edhe për një mandat, duke thënë se për këtë çështje do të diskutohet në vitin e ardhshëm, kur edhe përfundon mandati i saj.
Osmani ka deklaruar se asnjë vendimi i saj politik s’është bazuar në kalkulime personale, por vetëm për atë se ku do të jetë Kosova dhe qytetarët.
“Nga viti i ardhshëm, do të diskutojmë për këtë çështje. Gjatë gjithë karrierës sime politike, kam punuar gjithmonë duke pasur parasysh interesin e Kosovës dhe qytetarëve të saj. Asnjëherë, asnjë vendim imi politik nuk është bazuar në kalkulime për atë se ku do të jem unë, por vetëm se ku do të jetë Kosova dhe qytetarët e saj.Edhe këtë herë, vlerësimi se ku mund të kontribuoj do të bëhet vetëm duke pasur parasysh interesin e Kosovës dhe qytetarëve të saj. Asnjëherë në jetën time nuk jam varur nga politika, nuk varem as tani. Do t’u shërbej qytetarëve të Kosovës për aq kohë sa ata dëshirojnë që unë t’u shërbej atyre”, ka thënë Osmani para mediave.
Osmani është zgjedhur presidente e Republikës së Kosovës më 4 prill 2021.
Pas përfundimit të mandatit të parë, presidenti mund të rizgjedhet vetëm edhe një herë.
