Kryetari i Aleancës për Ardhmërinë e Kosovës (AAK), Ramush Haradinaj, është deklaruar pas përfundimit të seancës së radhës në kuvend, e cila sërish dështoi për të zgjedhur kryetarin.
“Nëse propozohet Fatmir Limaj, nuk besoj se do ta marrë votën e Aleancës”, tha Haradinaj, duke komentuar mbi mundësinë e një kandidature alternative për postin e kryeparlamentarit.
Ai shtoi se përfaqësuesja e AAK-së ka marrë pjesë në takimin konsultativ të ftuar nga kryesuesi Avni Dehari, siç kanë bërë edhe në herët e tjera, transmeton IndeksOnline, përcjell Veriu.info
“Përfaqësuesja jonë sot i është përgjigjur ftesës së Deharit. Deri tani kemi marrë pjesë në çdo takim të këtij lloji dhe besoj se do të vazhdojmë kështu. Më vjen keq që mungon mirëkuptimi edhe nga VV-ja për të dalë nga kjo situatë,” u shpreh ai.
Haradinaj theksoi se AAK-ja është e interesuar që procesi të ecë përpara dhe Kuvendi të konstituohet, por se bashkëpunimi kërkon më shumë se imponim.
“Deri më tani, beteja politike nuk ka qenë realisht për kryetarin e Kuvendit apo konstituimin. Ne jemi të interesuar që kjo fazë të përmbyllet dhe të vazhdojmë më tutje. Bashkëpunimi nuk funksionon sipas parimit ‘bëj si të them unë’ – duhet të ketë dialog dhe mirëkuptim,” theksoi ai.
