Deputetja e Nismës Socialdemokrate, Xhevahire Izmaku, nuk e ka përjashtuar mundësinë e një koalicioni mes këtij subjekti dhe Lëvizjes Vetëvendosje për formimin e Qeverisë së Kosovës.
Izmaku, në emisionin “Ditari” në Tëvë1, ka thënë se nëse LVV-ja arrin të sigurojë një mazhorancë për krijimin e institucioneve, atëherë Nisma do të ulet sërish në tavolinë negociatash.
“Nuk e shoh të pamundshme. Ne nuk kemi ndërprerë komunikimin, mirëpo tentativa jonë ka qenë te kërkesa që të vijnë në shprehje 58 numrat që Vetëvendosje do t’i arrijë dhe lideri Limaj dhe ne si deputetë kemi deklaruar që në momentin kur ne e dimë se ekziston mundësi me u kriju një mazhorancë e cila e mundëson krijimin e institucioneve, pra nuk është një zgjidhje gjysmake ku ne e krijojmë institucionin ose e konstituojmë Kuvendin dhe pastaj nuk ka vota për krijimin e qeverisë, atëherë nuk kemi çfarë hyjmë në një dramë të tillë. Pra, nëse do të ketë mundësi që të krijohet një mazhorancë edhe që partia e parë do ta dëshmojë që ka arritur ta ketë numrin e mjaftueshëm prej 58 votash ku Nisma e plotëson këtë numër, ne do të ulemi në tavolinë përsëri dhe do të kemi hapësirë që të bisedojmë”, është shprehur ajo.
