Për lejimin e tërheqjes së 30% të mjeteve nga Trusti pensional do të protestohet të enjten në Prishtinë.
Këtë e ka bërë të ditur të dielën deputeti i PDK-së, Bekim Haxhiu i cili ka shpërndarë një postim të një grupi qytetarësh në Facebook.
“Pra të enjten protestojmë në mënyrë paqësore para Kuvendit të Kosovës, dhe ju bëjmë thirrje deputetëve të Kuvendit të votojnë Projektligjin për tërheqje 30 % të Trustit!”, shkruhet në grupin “Pro Tërheqjes 30% të Trust-it”.
Por, se a do t’i bashkohet Partia Demokratik e Kosovës kësaj proteste zëdhënësi Faton Abdullahu nuk ka dhënë një përgjigje konkrete.
Abdullahu tha për Front Online se iniciativën për tërheqjen e mjeteve nga Trusti do të jetë e pandalshme nga PDK-ja.
“Na vije mirë që kjo iniciativë e jona ka gjetur përkrahje në forma të ndryshme. Ne do të vazhdojmë me këtë iniciativë tonën dhe bashkë me qytetarët ta bëjmë trysnin gjithanshëm dhe pandalshëm deri sa kjo Qeveri të bindet se kjo është e drejtë e tyre dhe ata duhet ta gëzojnë sa më shpejtë që është e mundur”, potencoi Abdullahu.
Sipas zëdhënësit të PDK-së, Qeveria ‘Kurti’ gjithmonë është një hap prapa nga nevojat e qytetarëve.
“Partia Demokratike e Kosovës është e para që ka iniciuar dhe është angazhuar seriozisht që tu mundësohet qytetarëve të Kosovës të tërheqin mjete nga Trusti Pensional. Ne iniciuam këtë të parët dhe në këtë drejtim bëmë politika aktive, sidomos në Kuvendin e Kosovës, me të vetmin qëllim dhe përkundër të gjithave, që me ato mjete tua lehtësojmë atyre sado pak gjendjen aspak të mirë financiare e cila sado që determinohet edhe nga krizat dhe gjendja globale, stërkeqet tutje me veprimet dhe mosveprimet e kësaj qeverie depresive e cila gjithmonë është një hap prapa nga nevojat e qytetarëve”, u shpreh Abdullahu.
