Tashmë dihet qartë numri i deputetëve që partitë politike kanë fituar në zgjedhjet e 9 shkurtit 2025. Nga rezultatet preliminare, por jo të certifikuara, Lëvizja Vetëvendosje, ka arritur të siguroj 48 deputetë, PDK ka fituar 24 deputetë, LDK shkon në Kuvend me 20 deputetë, AAK-NISMA me 8 deputetë, 9 deputetë ka Lista Serbe si dhe pakicat jo-serbe me 10 deputetë dhe partia e Nenad Rashiq me 1 deputet.
VV, ani pse ka fituar zgjedhjet dhe ka numrin më të lartë të deputetëve, nuk po arrinë e vetme të sigurojë shumicën e mjaftueshme për të formuar një Qeveri të vetme sikur me 2021.
Kjo ka krijuar një situatë ku asnjë parti opozitare nuk është e gatshme të hyjë në koalicion me VV-në, duke theksuar se nuk e mbështesin për formimin e institucioneve të reja, përjashtuar liderin e NISMA-s, Fatmir Limaj, që ka shprehur gatishmëri për të bashkëpunuar me kreun e VV-së, Albin Kurtin.
Në anën tjetër, opozita ka bërë të qartë se mund të marrë përsipër formimin e Qeverisë, nëse LVV dështon në arritjen e një marrëveshjeje për krijimin e një shumice të thjeshtë parlamentare.
I gjithë ‘’topi’’ për formimin e institucioneve kalon tek Presidentja e vendit, Vjosa Osmani, e cila pas certifikimit të rezultateve, ligjërisht detyrohet ta bëjë thirrjen e seancës së Kuvendit për konstituimin e tij. Mundësinë e parë për formimin e Qeverisë së re do ta ketë Albin Kurti, pasi që partia e tij ka siguruar më së shumti ulëse në Kuvend, por të pamjaftueshme që ta krijojë i vetëm shumicën e re parlamentare. Nëse Kurti dështon t’i sigurojë së paku 61 votat e nevojshme, atëherë mundësia do t’i jepet Bedri Hamzës si kandidati për kryeministër i partisë së dytë më të madhe parlamentare, etj.
Kryetarja e partisë NDS, njëkohësisht zëvendëskryeministrja e vendit, Emilja Rexhepithotë se partia e saj është fituese e zgjedhjeve në komunitetin boshnjak.
‘’NDS- partia e së cilës unë jam lidere është fituese në radhët e komunitetit boshnjak’’ thotë ajo.
Rexhepi, deklaron se Kurti është personi më i votuar në Kosovë dhe pret që i njëjti ta formojë Qeverinë e re.
‘’Në këto zgjedhje, VV-ja është partia fituese në komunitetin shqiptar dhe Albin Kurti është personi që ka marrë më shumë vota nga qytetarët, nga i cili pres formimin e qeverisë së re Kurti 3’’, deklaroi ajo.
Megjithatë, Rexhepi, thotë se ka raporte korrekte me gjithë përfaqësuesit e opozitës, por në këto momente nuk sheh hapësirë që opozita ta formojë Qeverinë.
‘’Sa i përket opozitës, unë kam marrëdhënie korrekte me të gjithë përfaqësuesit politikë dhe kam qenë gjithmonë aty kur kanë pasur nevojë për votë për kryetarin e Parlamentit, për kryeministrat e qeverive të mëparshme dhe për të gjithë ish-presidentët e shtetit, në këtë moment nuk shoh hapësirë që opozita të formojë qeverinë’’ përfundoj ajo.
Kryetari i Partisë Liberale Egjiptiane (PLE), Veton Berisha thotë se nuk ka “vija të kuqe” për asnjë parti politike ose lider politik dhe se po ashtu nuk ka ndonjë problem me askënd.
‘’Nuk kemi vija të kuqe, por duam të respektohemi ata që jemi dhe jo të shkojmë shabllon me krejt’’ thotë ai.
Deputeti i rizgjedhur, Veton Berisha, deklaron se si parti politike do i shërbejnë këtij vendi.
‘’Unë jam parti parlamentare, kam strukturë, kam organizim partiak, kam program politik, jem parti që kemi garu dhe kemi fitu. Ne si parti politike do i shërbejmë këtij vendi’’ u shpreh ai.
Berisha, thotë se për të ka rëndësi të formohet Qeveria sa më parë
‘’Ne nuk kemi asnjë problem me asnjë parti politike, me asnjë individ. Për mua ka rëndësi shumë që me u bërë Qeveria edhe Kosova me ecë përpara. Do të dëshiroja të ketë Qeveri politike’’ shton ai.
Sipas tij, kush do që i trajton dhe i respekton si partnerë, partia e tij do i mbështetë në formimin e Qeverisë.
‘’E kemi programin tonë, i kemi kërkesat tona dhe kush do që na trajton dhe na respekton si partnerë të tillë, nuk e kemi problem të i mbështesim’’ u shpreh Berisha.
Albert Kinolli, kryetar i Partisë Rome të Bashkuar (PRYK), thotë se nuk ka akoma vendim rreth asaj se si do të veprojnë si parti politike rreth formimit të Qeverisë së re.
”Nuk kam përgjigje akoma për këtë. Këtë përgjigje e marrim në Këshillin Drejtues të partisë’’ thotë ai
I pyetur nëse ka vija të kuqe, Kinolli thotë se me kalimin e kohës ato po hiqen.
‘’Tash është lehtë me thënë vija të kuqe, por rrethanat po ndryshojnë edhe vijat e kuqe po largohen’’ thotë ai.
Deputeti Kinolli u shpreh se pas certefikimit diskuton për këtë gjë.
‘’Pas certifikimit diskutojmë” deklaroi ai.
Kryetari i Lëvizjes Përparimtare të Romëve të Kosovës (LPRK), Exhan Galushi, për FrontOnline ka konfirmuar se nuk do të jetë deputet në Kuvendin e Kosovës.
Sipas tij, për 30 vota nuk ka arritur të bëhet deputet.
”Për 30 vota nuk e kam kaluar pragun për deputet’’ tha ai.
Sipas tij, po të ishte bërë përsëri deputet, do ta kishte mbështetë Qeverinë Kurti.
‘’Po të isha rizgjedhur, pa dyshim se e kisha mbështetë Qeverinë Kurti” u shpreh ai.
