Pas një konfrontimi të ashpër politik për 8 vite, duke i ‘harruar’ akuzat e rënda publike, Sami Lushtaku e Nuredin Lushtaku u pajtuan në muajin gusht dhe vendosen t’i bashkojnë forcat për zgjedhjet e 12 tetorit.
Rreth dy muaj prej asaj date, ata nuk po shihen së bashku nëpër aktivitete politike të fushatës zgjedhore në Skenderaj. Në tubime po marrin pjesë kryesisht kryetari aktual i komunës, Fadil Nura dhe kandidati për kryetar komune, Sami Lushtaku, që është edhe nënkryetar i komunës.
Një pajtim që pritej të tregonte fuqinë mes tyre, duket se është më shumë një pendesë se sa bashkim në terren, shkruan Veriu.info.
Nuredin Lushtaku nuk ka asnjë postim në rrjetin social Facebook në mbështetje të kandidaturës së Sami Lushtakut e as postim që ka të bëjë me fushatën zgjedhore. Madje, nuk ka postim që tregon pajtimin me Samiun e bashkimin me PDK-në.
Kujtojmë se konfontimi politik mes tyre kishte ndodhur në vitin 2017, kohë kur që të dytë synonin me çdo kusht kandidaturën e PDK-së për kryetar komune. I gjendur përball një situatë me rrezik për pasoja të mëtutjeshme, kryetari i atëhershëm i PDK-së, Kadri Veseli kishte vendosur të mos nominoj kandidat për kryetar komune, duke u pajtuar që Bekim Jashari të jetë kandidat i pavarur për kryetar, me përkrahjen zyrtare të PDK-së.
Pas katër vitesh qendrimi në pushtet të Bekim Jasharit si kryetar dhe Nuredin Lushtakut si nënkryetar komune, PDK-ja kishte fituar zgjedhjet për kryetar komune më 2021 dhe kryetar ishte zgjedhur Fadil Nura.
Gjatë qeverisjes 4 vjeçare të Fadil Nurës, IDEAL i Nuredin Lushtakut kishte akuzuar për keqqeverisje e keqpërdorime qeverisjen e binomit Fadil Nura – Sami Lushtaku.
Po gjithçka kishte ndryshuar në mes të muajit gusht kur kusherinjtë, Samiu e Nuredini vendosen të pajtohen dhe të vazhdojnë së bashku rrugëtimin politik, i cili në terren tashmë nuk po shihet të jetë bërë realitet!/Veriu.info/
