Kryeprokurori i Prokurorisë Themelore në Prizren, Petrit Kryeziu, ka dhënë detaje rreth aksionit të gjerë për arrestimin e personave të dyshuar për manipulim me votat në zgjedhjet e 28 dhjetorit.
Sipas tij, hetimet kanë zbardhur një rrjet të gjerë ku përveç zyrtarëve partiakë, të përfshirë direkt në tjetërsimin e vullnetit të qytetarëve rezultojnë të jenë edhe familjarë të kandidatëve.
Gjatë deklaratës për mediat, Kryeziu konfirmoi se numri i të ndaluarve është i lartë, ndërsa disa të tjerë po kërkohen edhe jashtë shtetit.
“Numri që janë liruar shkon 5 apo 6 përderisa 109 janë të ndaluar. Ka edhe prej tyre që nuk iu janë përgjgiur ftesës mirëpo në këtë drejtim nuk kemi prova që ne i kemi ftu se gjenden jashtë vendit. Jemi në kërkim të tyre”, njoftoi kryeprokurori.
Ajo që bie në sy në këtë aksion është shoqërimi i personave që kanë lidhje familjare me subjektet politike, duke treguar se skema e manipulimit ishte e organizuar në rrethe të afërta.
“Ata janë edhe të subjekteve politike por ka që janë edhe familjarë dhe për ata që ne kemi pasur informata dhe I kemi shoqëruar në stacion policor, ka vendime për ndalim dhe janë sjell e shoqëruar për vednim për ndalim”, u shpreh ai.
Sa i përket përmasave të manipulimit në kutitë e votimit, shifrat e prezantuara nga Prokuroria janë alarmante dhe tregojnë për një tjetërsim masiv të rezultateve përmes heqjes dhe shtimit të votave sipas interesave të kandidatëve të caktuar.
“Ka 40 mijë e 497 vota të shtuara 27 mijë 505 vota të hequra, cka nënkupton kjo, nënkupton se në rast se ia ka hequr një kandidati i ka shut tek tjetri, në vend të një i ka shut menjëherë dy”, deklaroi ai.
Prokuroria Themelore në Prizren ka bërë të ditur se aksioni do të vijojë deri në zbardhjen e plotë të kësaj skeme, ku falsifikimi, kanosja dhe presioni kanë qenë mjetet kryesore të përdorura gjatë procesit zgjedhor të dhjetorit.
