Kryetari i LDK-së, Lumir Abdixhiku, vendosi që edhe në këto zgjedhje parlamentare ta lë jashtë listës së kandidatëve për deputet njërën nga figurat emblematike të LDK-së që nga themelimi i saj, Agim Veliun.
Të njëjtë gjë ia bëri Veliut edhe në zgjedhjet e kaluara më 9 shkurt të këtij viti, pasi ia mori degën e Podujevës ku Agim Veliu kishte udhëhequr si kryetar komune deri sa u bë ministër në vitin 2020, shkruan Veriu.info.
E në emër të “reformës” Lumir Abdixhiku vendosi në krye të degës atje, mjekun Ekrem Hyseni, i cili deri sot ka humbur secilë garë politike, fillimisht 2 herë për kryetar komune ku e mundi keq Shpejtim Bulliqi i Vetëvendosjes, njëherë më 2021 dhe sërish këtë vit më 12 tetor.
Por kjo nuk është humbja e vetme e Ekrem Hysenit, pasi ai humbi edhe garën për deputet më 9 shkurt duke mos marrë votat e nevojshme për të siguruar ulëse në Kuvend.
E për dallim nga ky, Agim Veliu nuk ka humbur asnjë garë politike ku ishte vet kandidat, duke fituar disa palë zgjedhje për kryetar të komunës së Podujevës por edhe duke fituar garën për deputet.
Por Lumir Abidxhiku ka vendosur ta lë jashtë fituesin e të gjitha garave, Agim Veliu, për ta futur në listë humbësin e të gjitha garave politike, Ekrem Hysenin.
Mbetet të shihet se si do të reflektojë kjo në rezultatin e LDK-së dhe tek elektorati i kësaj partie./Veriu.info/
