Kryetari i Lidhjes Demokratike të Kosovës, Lumir Abdixhiku, në një konferencë për media ka përjashtuar mundësinë e bashkëpunimit të LDK-së me Lëvizjen Vetëvendosje.
Abdixhiku ka thënë se LDK-ja s’ka pasur asnjë takim me asnjë parti politike pas zgjedhjeve parlamentare të 9 shkurtit.
“Nuk kemi pasur asnjë takim me asnjë prej partive politike në Kosovë, sidomos me partinë në pushtet. Nuk duam, nuk kemi dhe nuk punojmë për bashkëpunim me ta.
Qëndrimi ynë elektoral dhe paraelektoral ka qenë se LDK-ja nuk do të jetë pjesë e asnjë qeverie pa pozitën e kryeministrit, ky vazhdon të jetë edhe qëndrimi ynë tani”, ka thënë Abdixhiku.
Mbledhja e sotme është ma e gjatë në historinë e Lidhjes Demokratike të Kosovës, ka zgjatur rreth 5 orë e 7 minuta.
Partia që doli e treta në zgjedhjet e 9 shkurtit diskutoi mbi rezultatin zgjedhor, performancën nëpër degë në Kosovë dhe në mërgatë si dhe pozicioni pas rezultatit final.
