Kryetari i LDK-së, Lumir Abdixhiku, ka komentuar sulmet që Lëvizja Vetëvendosje po ia bën deputetit tashmë të zgjedhur të kësaj partie, Hysen Çekaj, i cili i mori 12 mijë vota në Kosovë e 12 mijë vota në mërgatë.
Abdixhiku tha se djali i Sali Çekajt, Hyseni, është pjesë e listës së LDK-së pikërisht për votat e mërgatës, teksa tha se ka qenë i bindur prej momentit të parë që e ka takuar atë se do ta mobilizojë votën e mërgatës.
“Jam i bindur një pjesë e madhe e mobilizimit të kësaj vote është për shkak të tij dhe jam i bindur se emri i tij është i votuar me meritë. Ajo për çka jam i habitur është se partia në pushtet e sulmon një djalë, jo vetëm të patriotit, por një djalë që e kanë kërkuar që të jetë pjesë e listës së tyre për këto zgjedhje”, tha Abdixhiku.
Më tej, Abdixhiku tha se sulmet e VV-së ndaj Çekajt janë pikërisht pse ky i fundit ka refuzuar që në zgjedhjet e fundit të jetë pjesë e listës së VV-së për deputet.
“Në vizitën e tij tek unë, Hyseni më ka folur për angazhimin e gjithë liderëve të tjerë të partisë në pushtet, një nga një, për ta marrë atë pjesë të listës dhe jam i habitur se si e kanë sulmuar një djalë të mirë e të shkolluar nga mërgata, që ka vendosur pas sa viteve të kthehet në vend si deputet”, theksoi ai në Rubikon.
“Nuk e kuptoj, përveç që e shoh një sulm të ulët të inatit pse ai nuk është në listën e tyre. Po të ishte në listën e tyre dhe po të merrte këto vota nga mërgata, do të ishte krejt e natyrshme. Pse erdhi në LDK, i solli këto vota duket e panatyrshme”, tha ai.
