Prokuroria Speciale ka zhvilluar një aksion të madh në disa lokacione lidhur me tenderin e dyshimte për dhënien me qera të fabrikës për përpunimin e mbetjeve shtazore. Përpos Ministrisë së Bujqësisë, AUV dhe AZHB- bastisjet janë zhvilluar edhe tek lokacioni i kompanisë fituese të tenderit. Kompania “LIP KS & IT SH.P.K”, aksionar e së cilës është biznesmeni multimilioner nga Ferizaj, Naser Maloku i cili njihet për të kaluar të dyshimtë biznesore.
Prokurori special, Admir Shala ka konfirmuar të martën janë duke u zhvilluar bastisje në katër lokacione të ndryshme lidhur me tenderin 8 milionësh për përpunimin e mbetjeve shtazore.
Lidhur me këtë po intervistohet edhe ministri Faton Peci.
Prokurori Shala konfirmoi se bastisjet janë duke u zhvilluar edhe tek lokacionet e kompanisë fituese të tenderit “LIP KS & IT SH.P.K” që ndodhet në Ferizaj.
Sipas të dhënave në ARBK, aksionar i kësaj kompanie figuron emri i afaristit të njohur nga Ferizaj, Naser Maloku.
Maloku, e fitoi në janar të këtij viti tenderin për marrjen në shfrytëzim të fabrikës për përpunimin e mbetjeve të kafshëve, në bashkëpunim me një ortak nga Serbia. Ndaj tij u raportua në media se ishte një proces i dyshim dhe përbente shkelje ligjore.
Prokuroria Speciale është duke e hetuar këto dyshime. Gjatë bastisjeje bëri të ditur se ka sekuestruara disa dokumente që ndërlidhen me rastin në Ministrinë e Bujqësisë.
Biznesmeni Naser Maloku dhe lidhjet e tij me kompaninë serbe
Maloku është aksionar në kompaninë “LIP KS & IT” Sh.p.k., e cila fitoi tenderin për fabrikën e mbetjeve nënshtazore në janar të këtij viti. Një nga bashkë-themeluesit e kësaj kompanie është “MR & MNE” D.O.O., filiali i një kompanie serbe me seli në Podgoricë, Mal i Zi. Pronari i kësaj kompanie është Muamer Ragipoviq, një shtetas serb që udhëheq kompaninë “MR & Co” D.O.O. me seli në Beograd.
Megjithatë, një muaj pas nënshkrimit të kontratës me Ministrinë e Bujqësisë, kompania serbe ka tërhequr aksionet e saj nga “LIP KS & IT”, duke ngritur pyetje mbi natyrën e kësaj marrëdhënieje dhe mundësinë e ndikimeve të huaja në proceset tenderuese në Kosovë.
Deklarimet e Pecit
Ministri i Bujqësisë, Faton Peci tha të enjten në emisionin Pressing të T7 se nuk ka qenë në dijeni për pronarët që fshihen prapa kompanisë të cilës ministria ia dha në shfrytëzim fabrikën për përpunimin e mbetjeve të kafshëve.
“S’ta kom idenë se kush janë emrat e përveçëm”, pohoi ai gjatë një interviste me gazetarin Leonard Kërquki dhe tha se dosjen e plotë tashmë e ka deponuar në Prokurori.
Kush është afaristi Naser Maloku
Naser Maloku, një nga biznesmenët më të fuqishëm në Ferizaj njihet për të kaluarën e tij të dyshimtë në fushën e biznesit.
Në vitin 2021, ai e çoi drejt falimentimit një kompani të sigurimeve pasi e rrezikoi tregun duke operuar me ‘borxhe’ miliona euro.
Po ashtu, një nga kompanitë e tij dyshohet për përfshirje në aferën Brezovica.
