Anulimi i projektit për menaxhimin e mbeturinave, me vlerë 16.5 milionë euro, u arsyetua me mungesë buxheti. Vetëm pak kohë më pas, nën pushtetin e LDK-së në Prishtinë, për të njëjtat shërbime u iniciuan procedura të negociuara pa publikim. Zyrtarët komunalë, përfshirë Zyrtarin Përgjegjës të Prokurimit, kanë zgjedhur të mos japin asnjë sqarim publik. Paradoksalisht, LDK ka qenë partia që në nivel qendror ka kritikuar ashpër Qeverinë për përdorimin e kontratave të negociuara.
Një aferë e dyshimtë prokurimi ka mbërthyer Komunën e Prishtinës, ku anulimi i një projekti gjigant prej 16.5 milionë eurosh, me pretekstin e “mungesës së buxhetit”, është pasuar menjëherë nga kontrata të negociuara pas dyerve të mbyllura. Teksa dyshimet për manipulim po shtohen, zyrtarët komunalë kanë zgjedhur një strategji tjetër: heshtjen totale.
Gjithçka nisi më 18 nëntor 2024, kur Komuna e Prishtinës publikoi njoftimin për kontratë (616-24-11988-2-1-1) për “Menaxhimin e mbeturinave”, me vlerë të parashikuar prej 16,500,000.00 euro. Megjithatë, sapo u hapën ofertat, Zyrtari Përgjegjës i Prokurimit (ZPP), Visar Shehu, nënshkroi vendimin për anulimin e procesit, duke u arsyetuar se mjetet financiare nuk ishin parashikuar në buxhetin e vitit 2026.
Gazeta Insajderi i ka dërguar pyetje specifike ZPP-së, Visar Shehu, për të sqaruar se si është e mundur që për një tender të hapur nuk kishte fonde, ndërsa për tenderë të negociuar (616-26-27-2-1-5) buxheti u “shpik” menjëherë.
Deri në momentin e publikimit të këtij shkrimi, Shehu nuk ka kthyer asnjë përgjigje, duke lënë pa sqaruar nëse anulimi ishte rezultat i një gabimi profesional apo një strategji e qëllimshme për të matur ofertat e tregut para kalimit në procedura me negocim.
Operatori ekonomik “Zahiri SH.P.K”, i cili mbeti jashtë pas anulimit të tenderit, ka dorëzuar një ankesë të rëndë në Organin Shqyrtues të Prokurimit (OSHP) më 26 janar 2026. Citimet fjalë për fjalë nga ankesa e tyre hedhin dritë mbi prapaskenat e kësaj afere.
Për arsyetimin e buxhetit, kompania shkruan:
“Arsyetimi i AK-së se ky aktivitet i prokurimit anulohet për mungesë të mjeteve financiare është i pabazë, është i qëllimshëm dhe si i tillë i dëmshëm për OE-të.”
Ndërsa për tenderët e negociuar, thuhet:
“Si është e mundur që për procedurën e hapur AK-ja thirret në mungesë të mjeteve financiare, ndërsa po i njëjti AK ka iniciuar procedurën me negocim për shërbimet e njëjta? Kjo dëshmon se mjetet financiare ekzistojnë, por AK-ja me qëllim e ka anuluar procedurën e hapur që të vazhdojë me procedurë me negocim.”
Kontratat sekrete me pozicione
Pasi u “zhduk” projekti prej 16 milionë eurosh, Komuna e Prishtinës gjeti rrugën e negocimit pa publikim me kompani si “Selmans Network” dhe “Ledi SH.P.K”.
Në vend të një vlere totale kontraktuale, këto kontrata u lidhën me “pozicione të poentuara”, si 171.20 euro dhe 70.40 euro për njësi.
Kjo metodë krijon mjegull mbi koston reale të kontratave, pasi lejon pagesa pa një tavan të qartë financiar, duke ngritur dyshime për rritje të vëllimit të punëve jashtë kontrollit publik.
LDK-ja në Prishtinë hesht për “kontratat njëburimore”
Ndonëse Lidhja Demokratike e Kosovës në nivel qendror është shfaqur si kritiku më i zëshëm i kontratave njëburimore të qeverisë, në Prishtinë, kabineti i kryetarit ka zgjedhur të mos u përgjigjet pyetjeve se pse një shërbim kaq kritik si menaxhimi i mbeturinave po trajtohet përmes procedurave të mbyllura.
Heshtja e Visar Shehut dhe e Kabinetit të Kryetarit përballë fakteve të dokumentuara vetëm sa i shton dyshimet se anulimi i projektit prej 16.5 milionë eurosh nuk ishte çështje buxheti, por një manovër e mirëllogaritur për të selektuar fituesit jashtë syrit të publikut.
