Analisti politik Agon Maliqi, në një intervistë për Radion Evropa e Lirë, ka komentuar afatin kushtetues që përfundon më 26 tetor, sipas të cilit kryeministri në detyrë Albin Kurti duhet ta paraqesë për votim në Kuvend përbërjen e qeverisë së re.
Sipas Kushtetutës, në rast se mandatarit të parë nuk i miratohet qeveria, presidentja e vendit ka dhjetë ditë kohë për t’ia dhënë mandatin partisë së dytë – në këtë rast, PDK-së.
Megjithatë, Maliqi vlerëson se Kurti me shumë gjasë nuk do të arrijë ta sigurojë shumicën parlamentare, ndërsa skenari më i mundshëm është shkuarja në zgjedhje të parakohshme.
“Me shumë gjasë kryeministri në detyrë nuk do ta arrijë formimin e shumicës. Pastaj pritjet janë që presidentja t’ia jap mundësinë partisë së dytë, në këtë rast PDK-së, për ta ndërtuar një shumicë,” ka thënë Maliqi.
Ai shtoi se nuk shihet ndonjë vullnet politik as te kampi i ish-opozitës për të formuar një qeveri të përkohshme apo një koalicion jetëshkurtër deri në pranverë.
“Nuk duket që ka disponim për një qeveri apo koalicion jetëshkurtër deri në prill. Por ndoshta partitë e ish-opozitës mund të pajtohen për mënyrën e shpërbërjes së Kuvendit – me një qeveri teknike tranzitore që do të miratonte disa ligje bazë, si buxhetin, para se të shkojmë në zgjedhje,” ka theksuar ai.
Sipas Maliqit, opozita ka potencialin për të formuar një qeveri teknike, nëse arrin të sigurojë shumicën e nevojshme prej 61 votash.
“Besoj që mund t’i sigurojë numrat për një gjë të tillë, sepse nuk duken të gatshëm për të formuar koalicion. Madje, shoh përparësi që të formohet një qeveri teknike e përkohshme, në mënyrë që Kurti të mos jetë më kryeministër në detyrë gjatë kohës së zgjedhjeve,” ka thënë analisti.
Ai vlerëson se Kurti i ka të mbyllura dyert me partitë e mëdha shqiptare dhe se çdo përpjekje e tij e fundit për të siguruar vota individuale do të ishte e paqëndrueshme.
“Besoj që mund të ketë ndonjë përpjekje të fundit për ‘kontrabandim’ të ndonjë deputeti, por edhe në këtë rast do të ishte një qeveri shumë afatshkurtër, që nuk do t’i kishte numrat për zgjedhjen e presidentit,” tha Maliqi.
Sipas tij, Kurti nuk përfiton shumë politikisht nga zvarritja e procesit, përveçse mund të fitojë pak kohë për të fragmentuar opozitën.
“Nuk mendoj se ai fiton në imazh nga vonesa. Krejt çka mund të ndikojë është që kjo blerje kohe mund t’i ndihmojë në përçarjen e opozitës dhe potencialisht të ndikojë në tkurrjen e AAK-së dhe Nismës nën prag,” theksoi ai.
Maliqi parashikon se zgjedhjet e parakohshme nuk do të sjellin ndonjë ndryshim të madh në shpërndarjen e mandateve, përveç rastit kur ndonjë parti e vogël nuk e kalon pragun.
“Edhe pas zgjedhjeve, partitë do të detyrohen të arrijnë një lloj konsensusi, sepse skena politike është e ndarë në mënyrë që imponon bashkëpunim,” thotë Agon Maliqi.
